ქართველ ფეხბურთელს ამ სეზონში უკვე 13 გოლი და 8 საგოლე გადაცემა მოუგროვდა, თანაც ეს იმის ფონზე, რომ ლიონში დიდ სათამაშო დროს ვერ იღებს.
ასეთი კარგი სათამაშო ფორმის ფონზე, ფრანგული მედია გიორგი მიქაუტაძის შესაძლო გაყიდვაზე კიდევ ერთხელ ალაპარაკდა. როგორც საფრანგეთში წერენ, თუ ქართველმა ფეხბურთელმა სეზონის ბოლომდე ასე გააგრძელა, ზაფხულში ლიონს მისი შენარჩუნება ძალიან გაუჭირდება. ამ ყველაფერს ემატება ფრანგული კლუბის ფინანსური პრობლემებიც — მოსალოდნელია, რომ ზაფხულში კლუბს რამდენიმე ფეხბურთელი დატოვებს, მათ შორის გუნდის ლიდერი რაიან შერკი.
შეგახსენებთ, ზამთრის სატრანსფერო ფანჯრის დროს, გიორგი მიქაუტაძის ტრანსფერზე თურქული გალათასარაი მუშაობდა, თუმცა ეს გარიგება არ შედგა. ზაფხულში მოსალოდნელია, რომ ქართველი ფეხბურთელის თაობაზე ლიონს ბევრად დიდი კლუბები დაუკავშირდებიან. ასევე ისიც უნდა ითქვას, რომ ბევრი რამ ლიონის ჩემპიონთა ლიგაზე გასვლაზეც იქნება დამოკიდებული.
ზაფხულის სატრანსფერო ფანჯრის მოახლოებასთან ერთად, გიორგი მიქაუტაძის თაობაზე უფრო მეტი ინფორმაცია გახდება ცნობილი.
ფეხბურთთან ახლოს #5 | მოგება სომხეთთან და უსიამოვნო ინციდენტი მატჩის შემდეგ
