ფედერიკო ვალვერდესა და ორელიან ჩუამენის დაპირისპირება მადრიდის რეალის ფეხბურთელებს შორის ჩხუბის პირველი შემთხვევა არ არის. ისტორიას ახსოვს ფერნანდო იეროსა და კლარენს ზეედორფის კონფლიქტი, ასევე ტომას გრავესენი რობინიო დე სოუზას წინააღმდეგ.
ფერნანდო იერო V კლარენს ზეედორფი
ეს მოხდა ჩემპიონთა ლიგის 1998/1999 წლების სეზონის მეოთხედფინალში, სადაც რეალი კიევის დინამოსთან დამარცხდა. მატჩის მსვლელობისას მადრიდელთა სასარგებლოდ დაინიშნა ჯარიმა, რომლის შესრულება გადაწყვიტა იერომ, მაგრამ ზეედორფმა მას ბურთი ხელებიდან გამოგლიჯა.
დაიწყო შეხლა-შემოხლა, რის შედეგადაც კონფლიქტში ჩარევა "სამეფო კლუბის" სხვა ფეხბურთელებსაც მოუწიათ. ორივე მოთამაშე დაჯარიმდა 5 000 პესეტით და ამის გარდა, სანტიაგო ბერნაბეუს მკვიდრებმა ნიდერლანდელ ფლეიმეიქერთან დამშვიდობებაც გადაწყვიტეს. იმ სეზონის დასრულების შემდეგ, კლარენსი მილანის ინტერში გაყიდეს.
ტომას გრავესენი V რობინიო დე სოუზა
გრავესენის ტემპერამენტი არავისთვის იყო საიდუმლო და 2006 წელს მისი რისხვა საკუთარ თავზე რობინიომ გამოსცადა. ვარჯიშზე შეჯახების შემდეგ, დანიელ და ბრაზილიელ ლეგიონერთა კონფლიქტი ფიზიკურად დაპირისპირებამდე გადაიზარდა. ყველაფერი დასრულდა იმით, რომ ფაბიო კაპელომ ორივე მოთამაშე ვარჯიშს მოკვეთა.
ფედერიკო ვალვერდე V ორელიან ჩუამენი
ამ სეზონის ბოლოს რეალში ფეხბურთელებს შორის მდგომარეობა ფიზიკურ დაპირისპირებამდეც მივიდა. ელ კლასიკოს გამართვამდე რამდენიმე დღით ადრე, ვალვერდესა და ჩუამენის შორის მოხდა შეხლა-შემოხლა, რომელიც პირველის საავადმყოფოში გადაყვანით დასრულდა.
გავრცელებული ინფორმაციით, ურუგვაელ და ფრანგ ნახევარმცველებს შორის ურთიერთობა ისედაც დიდი ხანია გაფუჭებულია. ჯერჯერობით უცნობია, თუ რა გადაწყვეტილებას მიიღებენ მადრიდელები ფედერიკოსა და ორელიანის მიმართებაში. საკმაოდ მაღალია იმის ალბათობა, რომ "სამეფო კლუბმა" დაიტოვოს ურუგვაის ეროვნული გუნდის შუახაზელი, მონაკოს ყოფილი ჩამშლელი კი სხვა გუნდში გაყიდოს.
