მსოფლიო ჩემპიონატის დაწყების წინ, განვიხილოთ ის ნაკრებები, რომლებიც ტურნირის ფავორიტებად მოიაზრებიან. გამოვყავით შვიდი ეროვნული გუნდი: არგენტინა, ბრაზილია, საფრანგეთი, ესპანეთი, გერმანია, ინგლისი და პორტუგალია.
არგენტინა - ლიონელ მესის გარშემო გაერთიანებული მსოფლიო ჩემპიონები
მოქმედი მსოფლიო ჩემპიონი ცხადია ფავორიტებს შორის არის. არგენტინის ტრიუმფიდან გავიდა ოთხი წელი, თუმცა ნაკრების ფუნდამენტი ჯერ კიდევ შენარჩუნებულია. "ალბისელესტეში" მთავარი არის მესის ფაქტორი: მოთამაშე, რომელმაც თავისი ქვეყნის ეროვნულ გუნდს 34-წლიანი პაუზის შემდეგ, მუნდიალი მოაგებინა.
დიახ, არგენტინელი შემტევი უკვე 38 წლის არის, თუმცა ამის მიუხედავად, მსოფლიო ჩემპიონატს ხვდება მშვენიერ ფორმაში - 13 გოლი 15 შეხვედრაში აშშ-ს საფეხბურთო ჩემპიონატის ახალი სეზონის დაწყების მომენტიდან. როგორც აღვნიშნეთ, "სელესიონმა" მთავარი ბირთვი შეინარჩუნა, მაგრამ არის 1 გამორჩეული მოთამაშე 2022-ის გუნდიდან, რომელიც მოახლოებულ მუნდიალზე არ იქნება.
საუბარია ანხელ დი მარიას შესახებ, ვინც საერთაშორისო კარიერა ორი წლის წინ დაასრულა. ვნახოთ, როგორ ჩაანაცვლებს ლიონელ სკალონი ლეგენდარულ არგენტინელ ვინგერს თავის გუნდში. რაც შეეხება მოქმედ ჩემპიონთა სხვა ვარსკვლავებს, კარში კვლავ ემი მარტინესია, რომლის საკლუბო კარიერა უკანასკნელ წლებში ახალ საფეხურზე ავიდა.
2026 წლის მსოფლიო ჩემპიონატი იქნება ბოლო ცეკვა ლიონელისთვის, ისევე როგორც ნიკოლას ოტამენდისთვისაც. დიახ, ვეტერანი არგენტინელი უკანახაზელი კვლავ შემადგენლობაშია. შუახაზში ვიხილავთ როდრიგო დე პოლს, ალექსის მაკ ალისტერსა და ენცო ფერნანდესს.
რაც შეეხება თავდასხმას, ინტერ მაიამის კაპიტნის გვერდით, ლაუტარო მარტინესი და ხულიან ალვარესი იქნებიან. როგორც ვხედავთ, არგენტინაში მნიშვნელოვნად მართლაც არაფერი შეცვლილა. ბოლოს კი ვისაუბროთ მოწინააღმდეგეებზეც ჯგუფურ ეტაპზე: ავსტრია, ალჟირი და იორდანია.
ობიექტურად, "ალბისელესტე" გამოკვეთილი ფავორიტი იქნება. მოქმედი მსოფლიო ჩემპიონი თავისი ჯგუფიდან უდიდესი ალბათობით გავა პირველი პოზიციით და ასეთ შემთხვევაში "სელესიონი" 1/16 ფინალში შეხვდება H ჯგუფში მეორე ადგილზე გასულ ეროვნულ გუნდს: ესპანეთს, ურუგვაის, საუდის არაბეთსა და კაპო ვერდეს შორის ერთ-ერთს.
ბრაზილია - კარლო ანჩელოტის ურთულესი მისია მსოფლიოს მთავარ ნაკრებში
უკვე 24 წელია, რაც ბრაზილიას ჩემპიონის რანგში ვეღარ ვხედავთ. უფრო გრძელი მშრალი სერია მსოფლიოს მთავარ ნაკრებს ჰქონდა პირველ ტრიუმფამდე: 1930-დან - 1958-მდე (28 წელი). ასევე გამოსარჩევია 1970 - 1994-ის შუალედი, როცა "სელესაომ" ნავსი 24 წლის შემდეგ გატეხა. დიახ, 24-წლიანი უტიტულობა მუნდიალზე "პენტაკამპეონეს" ჰქონდა წარსულშიც, უბრალო დამთხვევა, თუ...
მდგომარეობის გამოსასწორებლად ბრაზილიაში მივიდა ანჩელოტი - მწვრთნელი, ვისაც ხუთი ჩემპიონთა ლიგის თასისა და ევროპის ხუთივე ტოპ ლიგაში ჩემპიონობით, საკლუბო ფეხბურთში ბადალი არ ჰყავს. იტალიელი სპეციალისტი "სელესაოს" ისტორიაში პირველი უცხოელი რეგულარული დამრიგებელია.
ვნახოთ, როგორი იქნება კარლოს თავგადასავალი საერთაშორისო ასპარეზზე. რაც შეეხებათ ფეხბურთელებს, ვინც განაპირობებენ "პენტაკამპეონეს" ფავორიტობას: კარში ალისონ ბეკერია, რომლის დუბლიორი იქნება კიდევ ერთი ვარსკვლავური გოლკიპერი, ედერსონ მორაესი.
ანჩელოტის გუნდის დაცვაში ხმამაღალი სახელი არის მხოლოდ ორი - პარის სენ-ჟერმენის კაპიტანი, მარკინიოს კორეა და არსენალის ერთ-ერთი ლიდერი, გაბრიელ მაგალიაესი. არსებობს მოსაზრება, მსოფლიოს საუკეთესო უკანახაზელი აღნიშნული მომენტისთვის სწორედ ლონდონელთა ლეგიონერია.
რაც შეეხება ბრაზილიის ნახევარდაცვას, ყველასთვის კარგად ნაცნობი ფეხბურთელები - კარლოს კაზემირო, ფაბინიო ტავარესი, ლუკას პაკეტა და ბრუნო გიმარაესი. "სელესაოს" მთავარი სიძლიერე უდავოდ შეტევაა, რომელიც გაბრიელ ჟეზუსის, რიშარლისონ დე ანდრადეს, როდრიგო გოესისა და ჟოაო პედროს გარეშეც მრისხანეა.
თავად განსაჯეთ - რაფინია ბელოლი, ვინიუს ჟუნიორი, მატეუს კუნია, გაბრიელ მარტინელი, ენდრიკ დე სოუზა, ასევე პრემიერ ლიგის განვლილი სეზონის მთავარი სენსაცია, იგორ ტიაგო. ბოლოს კი მთავარი: "პენტაკამპეონეში" ნეიმარ ჟუნიორი დაბრუნდა. ბოლო წუთამდე იყო გაურკვეველი, წაიყვანდა თუ არა ანჩელოტი ბრაზილიელ ფორვარდს.
იტალიელმა მწვრთნელმა საბოლოოდ მაინც მისცა შანსი სანტოსის კაპიტანს, რითაც მთელი ქვეყნის ოვაციები დაიმსახურა. რაც შეეხება ბრაზილიის მოწინააღმდეგეებს ჯგუფში: მაროკო, შოტლანდია და ჰაიტი. იმის გათვალისწინებით, რომ მეტოქე არის გასული მუნდიალის 1/2 ფინალისტი და აფრიკის მოქმედი ჩემპიონი, "სელესაოს" პირველობა არ ჩანს ისე გამოკვეთილად, როგორც თუნდაც იგივე არგენტინის.
ინგლისი - თასის სახლში დაბრუნების მორიგი მცდელობა
ინგლისმა თავისი პირველი და ამ დროისთვის ბოლო მსოფლიო ჩემპიონობა 1966 წელს იზეიმა. იმის შემდეგ გავიდა 60 წელი და 14 ტურნირი, მაგრამ "3 ლომი" კვლავ უტიტულოდაა. უკანასკნელი მუნდიალების მსგავსად, აღნიშნული ქვეყნის ეროვნული გუნდი ფავორიტი აშშ-შიც იქნება.
რა შეიცვალა ბრიტანელებში 2022 წლის მსოფლიო ჩემპიონატის შემდეგ? გარეთ საუთგეიტი ჩაანაცვლა ტომას ტუხელმა, ვინც სვენ-გორან ერიქსონისა და ფაბიო კაპელოს შემდეგ, ინგლისის ეროვნული გუნდის ისტორიაში მე-3 უცხოელი დამრიგებელია. აღსანიშნავია ის, რომ გერმანელი თავკაცის არჩევანმა მოთამაშეთა შერჩევის საკითხში დიდი რეზონანსი გამოიწვია.
"სამი ლომის" მწვრთნელმა უარი თქვა არაერთ ვარსკვლავზე, მათ შორის ჰარი მაგუაიერზე, ტრენტ ალექსანდერ-არნოლდზე, ფილ ფოდენსა და კოულ პალმერზე. რაც შეეხება იმ მოთამაშეებს, რომლებიც ბრიტანელთა განკარგულებაში იქნებიან, რა თქმა უნდა, პირველ რიგში ჰარი კეინია გამოსარჩევი.
ინგლისელი თავდამსხმელი უკვე წლებია, რაც ითვლება მსოფლიოს ერთ-ერთ საუკეთესო ფეხბურთელად და 2026 წელს ის ოქროს ბურთის მოგების რეალურ პრეტენდენტათაც მოიაზრება. მიუნხენის ბაიერნის ფორვარდმა საკლუბო სეზონი დაასრულა 61 ბურთით და 21-ე საუკუნეში, მესი-რონალდუს შემდეგ, ის არის მე-3 მოთამაშე 60+ გოლით.
იმ შემთხვევაში, თუ ტუხელის გუნდი გახდება მსოფლიო ჩემპიონი, "რეკორდმაისტერის" ცხრიანი ოქროს ბურთის მიღების ნომერ პირველ პრეტენდენტათაც მოგვევლინება. რაც შეეხებათ ინგლისის ეროვნული გუნდის სხვა ლიდერებს, დიახ, გერმანელმა დამრიგებელმა მუნდიალს მიღმა დატოვა არაერთი გამორჩეული მოთამაშე, მაგრამ მას მაინც დიდი არჩევანი აქვს.
პირველ რიგში გამოსარჩევები არიან საჩემპიონო არსენალის წამყვანი ფეხბურთელები - დეკლან რაისი და ბუკაიო საკა. მათ გვერდით იქნება ჯუდ ბელინგემიც, რომელიც ყველაფერს აკეთებს იმისთვის, რომ საფეხბურთო სამყარომ მისი 2024-ის მსგავსი ვერსია კვლავ იხილოს. აუცილებლად სახსენებელია რის ჯეიმსიც და თუ ის იქნება მწყობრში, "3 ლომს" მარჯვენა ფლანგზე სადარდებელი არაფერი ექნება.
ბრიტანელების მეტოქეები მსოფლიო ჩემპიონატის ჯგუფურ ეტაპზე იქნებიან ხორვატია, განა და პანამა. როგორც ვხედავთ, ერთი პრინციპული მოწინააღმდეგე ტუხელის შეგირდებს ჯგუფშივე ეყოლებათ. ვგულისხმობთ ბალკანელებს, რომლებმაც ჯერ ევრო 2008-ის შესარჩევში, შემდეგ კი 2018-ის მუნდიალის 1/2 ფინალში გაამწარეს ინგლისი.
საფრანგეთი - მთავარი ფავორიტი სუპერ შეტევით
ბევრის აზრით, 2026 წლის მსოფლიო ჩემპიონატის მთავარი ფავორიტი სწორედ საფრანგეთი არის. საკმარისია გადავხედოთ თავდასხმას - კილიან მბაპე, უსმან დემბელე, მაიკლ ოლისე, ბრედლი ბარკოლა და დეზირე დუე. აქედან სამმა მოთამაშემ ევროპის მთავარი საკლუბო ტურნირი მოიგო ზედიზედ მეორედ, დანარჩენი ორი "უბრალოდ" ბალონ დ'ორის მომავალი ნომინანტია.
"მამლების" კიდევ ერთი უპირატესობა იმალება მწვრთნელში, თუმცა ბევრის აზრით, დიდიე დეშამის ფაქტორი უარყოფითი მხარეც შეიძლება იყოს. საფეხბურთო სამყაროს ერთი ნაწილი მიიჩნევს, "ლურჯები" არიან ყველაზე შეთამაშებული ეროვნული გუნდი, იმის გათვალისწინებით, რომ მათ უკვე 14 წელია 1 სპეციალისტი ჰყავთ.
დეშამის გუნდი 2018 წელს გახდა მსოფლიო ჩემპიონი, ოთხი წლის შემდეგ კი მუნდიალის ფინალშიც აღმოჩნდა. 2026 წლის ტურნირი იქნება ფრანგი სპეციალისტის უკანასკნელი მისია, რადგან შემდეგ, მის ადგილს ზინედინ ზიდანი დაიკავებს. ცხადია, ლამაზად და ხმაურიანად წასვლის შანსი დიდიესთვის დამატებითი მოტივაცია იქნება.
რაც შეეხება საფეხბურთო სამყაროს იმ ნაწილს, რომელიც მიიჩნევს, რომ საფრანგეთის ნაკრების ამჟამინდელი მწვრთნელი ამ გუნდის არა ძლიერი მხარეა, არამედ სუსტი, აღნიშნული მოსაზრება ეფუძვნება სადამრიგებლო რესურსის ამოწურვის საშიშროებას...14 წელი ცოტა დრო ნამდვილად არაა.
ერთი სიტყვით, 57 წლის მწვრთნელის გარშემო არის აზრთა სხვადასხვაობა, ყველა კითხვას პასუხი კი მოახლოებულ მსოფლიო ჩემპიონატზე გაეცემა. არსებობს კიდევ ერთი სპეკულაცია, რაც უკავშირდება "მამლების" 2 ბანაკად დაყოფას: ერთ მხარეს რეალ მადრიდის ლიდერი და მისი თანამოაზრეები, მეორე მხარეს კი პარის სენ-ჟერმენის ვარსკვლავები.
"სამეფო კლუბის" ათიანი მიჩვეულია ერთპიროვნულ დომინანტობას და "ლურჯებში" მისი გამოჩენის მომენტიდან ყველაფერი სწორედ ასე იყო. მსგავსი სცენარი ვიხილეთ გასულ მუნდიალზეც, მაგრამ უკანასკნელ წლებში ბევრი რამ შეიცვალა. პსჟ-ს მე-10 ნომერი უკვე სულ სხვა სტატუსის მოთამაშეა, თანაც ის ბალონ დ'ორის მოქმედი მფლობელია.
არც ოლისე, ბარკოლა და დუე არიან იმ კატეგორიის ფეხბურთელები, ვინმეს ჩრდილში ნებაყოფლობით რომ აღმოჩნდნენ. ვნახოთ, შეძლებს თუ არა დეშამი ერთი იდეის ქვეშ მათ გაერთიანებას. რაც შეეხებათ მოწინააღმდეგეებს ჯგუფურ ეტაპზე: ნორვეგია, სენეგალი და ერაყი. არის თუ არა საფრანგეთი გამოკვეთილი ფავორიტი? რთული სათქმელია.
სკანდინავიელები განიცდიან თავიანთი ნაკრების არსებობის საუკეთესო პერიოდს, "ტერანგას ლომები" კი ბიუროკრატია რომ არა, აფრიკის თასის მოქმედი ჩემპიონები იქნებოდნენ. ამ ყველაფერს დავუმატოთ 2002 წელს დაფიქსირებული ერთ-ერთი უდიდესი სენსაცია, რომელიც ვირუსულად ედება "მამლებისა" და პაპ ჩაუს შეგირდების დუელს.
ვგულისხმობთ იაპონია / სამხრეთ კორეაში გამართული მსოფლიო ჩემპიონატის გახსნით მატჩს, სადაც მსოფლიოს იმდროინდელმა მოქმედმა ჩემპიონმა "ლურჯებმა" სწორედ სენეგალთან წააგეს. განმეორდება თუ არა აღნიშნული ისტორია 24 წლის შემდეგ? ყველაფერს ძალიან მალე გავიგებთ.
გერმანია - ჩრდილში მყოფი ფავორიტი
მსოფლიო ჩემპიონატის ფავორიტებს შორის ყველაზე ნაკლებად ვარსკვლავური შემადგენლობა გერმანიას ჰყავს. მთავარი იმედი არის დუეტი, რომელსაც უკვე წლებია, რაც დიდ მომავალს უწინასწარმეტყველებენ. საუბარია ჯამალ მუსიალასა და ფლორიან ვირცის წყვილზე...პოტენციალი მართლაც უდიდესია.
"ბუნდესნაკრები" აქამდე მოვიდა ისე, რომ მძიმე ტრავმასთან დაკავშირებულ პრობლემებს სხვადასხვა დროს ორივე ნახევარმცველი ებრძოდა. მოახლოებული მუნდიალის წინ კი თითოეული მათგანი ასე თუ ისე ოპტიმალურ ფორმაშია. აუცილებლად სახსენებელია ის ფაქტი, რომ "მანშაფტში" მანუ ნოიერი დაბრუნდა.
ჩემპიონთა ლიგის განვლილმა სეზონმა აჩვენა - ლეგენდარული გერმანელი მეკარე ჯერ კიდევ მწყობრშია. საინტერესოა ისიც, რომ იულიან ნაგელსმანმა ეროვნულ გუნდში დატოვა ლეროი სანე, მოთამაშე, რომელზეც უარს თავის დროზე იოახიმ ლიოვი ამბობდა. როგორც გვახსოვს, გერმანელი ვინგერი 2018-ის მუნდიალის განაცხადს მიღმა დარჩა.
"ბუნდესნაკრებმა" იმ მსოფლიო ჩემპიონატზე ვერ მოახერხა ჯგუფური ეტაპის გადალახვა, მომდევნო ტურნირზე კი ეს წარუმატებელი სერია კვლავ გაგრძელდა. აღნიშნული მოვლენა არის გერმანიის ეროვნული გუნდის მთავარი ანტირეკორდი, რომელიც წესით, მოახლოებულ მუნდიალზე უნდა შეწყდეს.
რაც შეეხება "მანშაფტის" მეტოქეებს ჯგუფურ ეტაპზე: კოტ-დ'ივუარი, ეკვადორი და მსოფლიო ჩემპიონატის დებიუტანტი კურასაო. ულაპარაკოდ, ნაგელსმანის გუნდი ფავორიტია, პირველი პოზიციის დაკავების აუციელებელი პირობით. თუ აღნიშნული რამ მოხდება რეალურად, გერმანიის მოწინააღმდეგე 1/16 ფინალში ერთ-ერთი მე-3 ადგილოსანი იქნება.
როგორც გვახსოვს, პირველ და მეორე პოზიციებზე გასულ ნაკრებებთან ერთად, მსოფლიო ჩემპიონატის პლეიოფში რვა საუკეთესო მესამეადგილოსანიც მოხვდება. სწორედ ერთ-ერთი მათგანი ელოდება "ბუნდესთიმს", თუ რა თქმა უნდა თავის ჯგუფში პირველ პოზიციას დაიკავებს.
პორტუგალია - კრიშტიანუ რონალდუს ბოლო ცეკვა
რონალდუ 2026 წლამდე მოვიდა ისე, რომ დაგვიტოვა არაერთი რეკორდი და წარუშლელი საფეხბურთო მემკვიდრეობა, თუმცა მის სუსტ წერტილად ყოველთვის მუნდიალი რჩებოდა. მესისა და ოჩოას მსგავსად, პორტუგალიელი ფორვარდი აღნიშნულ ტურნირზე ითამაშებს მეექვსედ, რაც ახალი რეკორდიც იქნება.
თუ მისმა არგენტინელმა კონკურენტმა ამ დროის განმავლობაში მოასწრო მსოფლიო ჩემპიონობა, კრიშტიანუსთვის საუკეთესო შედეგად დღემდე 2006 წლის მუნდიალის 1/2 ფინალი რჩება. იმის შემდეგ, ალ ნასრის კაპიტანმა გამოსცადა 2 წაგება 1/8 ფინალში და 2-ჯერ ჯგუფში ჩარჩენა.
რაც შეეხება 2022 წლის მსოფლიო ჩემპიონატს, მართალია, პორტუგალია მივიდა მეოთხედფინალამდე, თუმცა ლეგენდარულმა შვიდიანმა აღნიშნულ ტურნირზე შეაგდო მხოლოდ 1 ბურთი, ჯგუფურ ეტაპზე განასთან, 11-მეტრიანი. გამოსარჩევია ისიც, რომ 41 წლის ფორვარდს მუნდიალის პლეიოფში გოლი არასდროს გაუტანია.
რონალდუ ამ უარყოფითი სერიის დასრულებას 2026 წლის მსოფლიო ჩემპიონატზე ეცდება. წინაპირობა ნამდვილად არის, იმის გათვალისწინებით, რომ პირენეელებს მუნდიალზე ერთ-ერთი ყველაზე ძლიერი შემადგენლობა ჰყავთ. პირველ რიგში გამოსარჩევია შუახაზი: ბერნარდო სილვა, ბრუნო ფერნანდეში, ვიტინია ფერეირა და ჟოაუ ნევეში.
ერთი მათგანი მანჩესტერ სიტის აბსოლუტური ლეგენდაა, მეორე - პრემიერ ლიგის განვლილი სეზონის საუკეთესო ფეხბურთელი, ბოლო ორი კი პარის სენ-ჟერმენთან ერთად, ევროპის მთავარი საკლუბო ტურნირის თანამედროვე ისტორიის წერას აგრძელებენ. "ლუზიტანებს" არც უკანახაზი ჰყავთ ურიგო: ჟოაუ კანსელუ, რუბენ დიაში, ნუნო მენდეში და სხვები.
რაც შეეხებათ რობერტო მარტინესის გუნდის მეტოქეებს - კოლუმბია, კონგო და უზბეკეთი. კიდევ ერთი წინაპირობა იმისთვის, რომ პორტუგალიამ მუნდიალის პლეიოფში ხმაურიანად შეაბიჯოს. ვნახოთ, როგორი იქნება კრიშტიანუს უკანასკნელი ცეკვა მსოფლიოს მთავარ ტურნირზე.
ესპანეთი - ევროპის მოქმედი ჩემპიონი ნაკრები, რომელშიც რეალის ფეხბურთელები არ იქნებიან
ცხადია, ფავორიტების შესახებ საუბარი ევროპის მოქმედი ჩემპიონის ხსენების გარეშე ვერ ჩაივლიდა. საინტერესოა, რომ ესპანეთის შემადგენლობაში რეალის 1 მოთამაშეც ვერ მოხვდა. მსგავსი რამ მუნდიალის ისტორიაში მოხდა პირველად. დიახ, "ლა როხას" აღნიშნულ ტურნირზე აქამდე უთამაშია 15-ჯერ და მადრიდელთა მინიმუმ 1 წევრი გუნდში ყოველთვის ყოფილა.
მსოფლიო ჩემპიონატი გასაგებია, თუმცა "წითლების" ისტორიაში კიდევ გვხვდება ერთი ტურნირი, სადაც არ ყოფილან "სამეფო კლუბის" მოთამაშეები, თანაც არც ისე შორეული წარსულიდან. საუბარია ევრო 2020-ზე, რომელზეც ესპანეთის ეროვნული გუნდის იმდროინდელმა დამრიგებელმა, ლუის ენრიკემ სანტიაგო ბერნაბეუს მკვიდრებზე უარი თქვა.
"ფურია როხას" განაცხადის გამოცხადების შემდეგ, დიდი მითქმა-მოთქმა გამოიწვია იმ ფაქტმა, რომ ესპანელმა მწვრთნელმა ევროპის ჩემპიონატზე არ წაიყვანა რეალის იმდროინდელი კაპიტანი, სერხიო რამოსი. რაც შეეხება შედეგს, "წითლები" მივიდნენ 1/2 ფინალამდე, სადაც დამარცხდნენ მომავალ ჩემპიონთან, იტალიის ეროვნულ გუნდთან.
აღსანიშნავია, რომ პარის სენ-ჟერმენის ამჟამინდელი მწვრთნელი ესპანეთის ნაკრებში მუშაობდა 2022 წლის მსოფლიო ჩემპიონატზეც, თუმცა აღნიშნულ ტურნირზე მან მადრიდელი მოთამაშეები ამჯერად წაიყვანა. "ლა როხას" შემადგენლობაში კატარში ჩატარებულ მუნდიალზე დანი კარვახალი და მარკო ასენსიო იყვნენ.
"წითლები" დამარცხდნენ მერვედფინალში მაროკოსთან, რის შემდეგაც 56 წლის მწვრთნელმა თავისი ადგილი ლუის დე ლა ფუენტეს დაუთმო. დიახ, მის გუნდში არ იქნებიან "სამეფო კლუბის" მოთამაშეები, მაგრამ ევროპის მოქმედი ჩემპიონი ვარსკვლავების დეფიციტს მაინც არ განიცდის.
პირველ რიგში გამოსარჩევია ლამინ იამალი, თუმცა სათქმელია ისიც, რომ ახალგაზრდა შემტევი მსოფლიო ჩემპიონატზე ტრავმირებული მიემგზავრება. ესპანელი ვინგერის გვერდით იქნება ყველა ის მოთამაშე, რომელთან ერთადაც მან ევრო 2024 მოიგო. ასევე სახსენებელია როდრი ერნანდესის სტატუსი დღევანდელ ესპანეთში.
მან სიტის ნახევარმცველი იქნება პირველი კაპიტანი "ფურია როხას" ისტორიაში, ვინც ლა ლიგის ფარგლებს გარეთ თამაშობს. რაც შეეხებათ "წითლების" მოწინააღმდეგეებს: ურუგვაი, საუდის არაბეთი და მუნდიალის დებიუტანტი კაპო ვერდე. როგორც ვხედავთ, ჯგუფურ ეტაპზე ვიხილავთ მსოფლიო ჩემპიონი 2 ეროვნული გუნდის დუელს: ესპანეთისა და "სელესტეს".
