მოჰამედ მოკაევი მორიგ ბრძოლას გამართავს. 6 ივნისს, მადრიდში, დაუმარცხებელი მებრძოლი დაუპირისპირდება ხორხე კალვოს, ილია თოფურიას პრომოუშენში, WOW-ში. დიდი ბრიტანეთის სახელით მოასპარეზე მებრძოლს თავიდან უნდა ეჩხუბა MVP-ში, მაგრამ შემდეგ, მას გეგმები შეეცვალა.
ბრძოლის ჩანიშვნა და ორგანიზება SMH Sports-ისა და მისი წარმომადგენლის, კახა ჩიქოვანის დახმარებით მოხდა. შეგახსენებთ, რომ "დამსჯელი" 2022 - 2024 წლებში გამოდიოდა UFC-შიც, სადაც მან 7/7 ჩხუბი მოიგო. ზოგადად კი მოკაევის ანგარიშზე 15/15 გამარჯვება არის. ესპანურ პრესასთან საუბარში 25 წლის მებრძოლმა ისაუბრა WOW-ში მოხვედრაზე, "მატადორთან" ურთიერთობასა და სხვა საინტერესო საკითხებზე.
"გასულ წელს გავხდი Brave-ის ჩემპიონი - ორგანიზაციის, საიდანაც ასევე გამოვიდნენ ისეთი მებრძოლები, როგორებიც არიან თოფურია, ჩიმაევი და ქუთათელაძე. რაც შეეხება WOW-ს, ჩემი აზრით, დღეს ევროპაში ერთ-ერთი საუკეთესო ორგანიზაცია არის. მომწონს რა სწრაფი ტემპითაც ვითარდებიან.
ილია? ის დიდი მებრძოლია. მახსოვს მან თქვა, რომ დაანოკაუტებდა ჰოლოუეის, ბევრმა ეს არ დაიჯერა, თუმცა მან დანაპირები აასრულა. ძალიან ძლიერი ხელები აქვს და ამის გარდა, "მატადორი" როგორც პიროვნებაც დიდია. მას ჯერ კიდევ UFC-ში მოხვედრამდე ვიცნობდი. ქედმაღლობა? არა, თოფურია რასაც ამბობს, იმას აკეთებს", - განაცხადა მოკაევმა.
ბრძოლის წინ, Way Of Warrior-მა დიდი ბრიტანეთის სახელით მოასპარეზე მებრძოლს მიუძღვნა ვიდეო, სახელწოდებით The Revenant (გადარჩენილი), რომელშიც ის თავის განვლილ გზაზე უფრო დეტალურად საუბრობს.
