23 აგვისტოს, ჩვენი დროით 04:00 საათიდან საკრამენტოში დაგეგმილ UFC Fight Night 285-ის ფარგლებში რომან დოლიძე რენიე დე რიდერს დაუპირისპირდება. განვიხილოთ, თუ რას უნდა ველოდოთ აღნიშნული ჩხუბისგან.
ქვემძიმე წონით დივიზიონში დაბრუნება
დოლიძეს UFC-ში ჩატარებული აქვს 14 ბრძოლა და მისი მონაგარი ასეთია - 9 გამარჯვება და 5 მარცხი. უშუალოდ ქვემძიმე წონით დივიზიონში ქართველი მებრძოლის ანგარიშზეა 100%-იანი შედეგი: 3/3 მოგება. მისი დებიუტი მსოფლიოს მთავარ პრომოუშენში შედგა სწორედ 93 კილოგრამში, ეფექტური ჰედქიქით ხადის იბრაგიმოვის წინააღმდეგ.
ეს ბრძოლა გაიმართა 2020 წლის ზაფხულში და რამდენიმე თვით მოგვიანებით, ასევე ქვემძიმე წონით დივიზიონში რომანმა მსაჯების გაყოფილი გადაწყვეტილებით ჯონ ალანსაც მოუგო. ცალკე გამოსარჩევია ის ფაქტიც, რომ "კავკასიელმა" კარიერის სტარტზე WWFC-ის ქამარი მოიგო 93 კილოგრამში და შემდეგ ის წარმატებით დაიცვა კიდეც.
დავუბრუნდეთ 38 წლის ვეტერანის კარიერას UFC-ში, სადაც მან ქვემძიმე წონით დივიზიონში გამართა კიდევ ერთი ბრძოლა და მსაჯების ერთსულოვანი გადაწყვეტილებით ოჯახური ძალადობის სკანდალში გახვეულ ენტონი სმიტს მოუგო. ერთი სიტყვით, დოლიძის შეჩერება 93 კილოგრამში ვერავინ შეძლო.
ლოგიკურია, რომ ქართველი ვეტერანი ბრუნდება იმ დივიზიონში, სადაც ის ასეთი წარმატებულია, რადგან მის კარიერაში დაღმასვლა შეინიშნება. რომანმა წააგო თავისი 2 უკანასკნელი ჩხუბი, ჯერ საბმიშენით ენტონი ერნანდესთან, რომელიც 23 აგვისტოს ივენთზე იქნება მთავარ დუელში გრეგორი როდრიგესთან, შემდეგ კი გადაწყვეტილებით კრისტიან ლეროი დანკანთან.
"კავკასიელს" სჭირდება რეაბილიტირება იმისთვის, რომ UFC-ის ტოპ 15-ში კვლავ მოწინავე ადგილებზე დაბრუნდეს. დე რიდერთან ბრძოლის წინ, ის ოპტიმისტურადაა განწყობილი და ოპონენტთან მოგებას საბმიშენით გეგმავს. 38 წლის მებრძოლს ჯერ არ ჰქონია მსოფლიოს მთავარ პრომოუშენში გამარჯვება მტკივნეული ილეთით და ვნახოთ, შეძლებს თუ არა ის ნავსის გატეხვას ნიდერლანდელ მოწინააღმდეგესთან.
ვინ არის მეტოქე?
როგორც აღვნიშნეთ, დოლიძის მეტოქეა დე რიდერი, ვის ანგარიშზეც არის 25 ბრძოლა, საიდანაც 21-ში მან იმარჯვა, 4-ში კი დამარცხდა. უახლოესი ოპონენტის მსგავსად, ნიდერლანდელმა მებრძოლმა წააგო უკანასკნელ 2 ჩხუბში, ჯერ ბრენდან ალენთან, შემდეგ კი კაიო ბორალიოსთან. განსაკუთრებით მძიმე რენიესთვის ამერიკელ მოწინააღმდეგესთან დუელი გამოდგა.
ის ბრძოლა გაჩერდა მეოთხე რაუნდში, "რაინდის" კუთხის მოთხოვნით. სხვადასხვა დროს მას დაუმარცხებია ისეთი მეტოქეები, როგორებიც არიან რობერტ უიტეკერი, ბო ნიკალი, კევინ ჰოლანდი და შეგახსენებთ, ამ უკანასკნელს ქართველმა მებრძოლმაც მოუგო. დიახ, კარიერის რეანიმირება სჭირდება როგორც რომანს, ისე მის 35 წლის მოწინააღმდეგესაც.
საინტერესოა ისიც, რომ დე რიდერს უკვე აქვს ქართველი მებრძოლების დამარცხების გამოცდილება - 2017 წლის ოქტომბერში მან მტკივნეული ილეთით მოუგო შოთა გვასალიას, რითაც HIT-ის 84 კილოგრამ წონითი დივიზიონის ქამარი მოიპოვა. ნიდერლანდელ მებრძოლს წარსულში არაერთხელ უჩხუბია 93 კგ-ში და 2021-2022 წლებში ის ONE-ის ქამრის მფლობელიც იყო.
რაც შეეხება უშუალოდ UFC-ში გატარებულ პერიოდს, ქვემძიმე წონით დივიზიონში რენიე სადებიუტო ბრძოლას გამართავს. "კავკასიელის" მსგავსად, ოპტიმისტურადაა განწყობილი "რაინდიც", რომელიც თავის მოწინააღმდეგეს მოკვლითაც კი დაემუქრა. მისი მიზანია არა მხოლოდ მოგება, არამედ ეფექტურად მოგება.
