ზაფხულის სატრანსფერო ფანჯრის დახურვამდე 6 დღით ადრე, რაფაელ ლეაუს შესახებ საუბრები არ წყდება. როგორც მოგეხსენებათ, პორტუგალიელმა ფეხბურთელმა "როსონერიდან" წასვლა მაისის თვეში დააანონსა, თუმცა 27 წლის ვინგერი ამ დრომდე მილანის ფეხბურთელია.
ლეაუს პოზიციას ემატება რუბენ ამორიმის გეგმებიც. როგორც ცნობილი ხდება, პორტუგალიელ სპეციალისტს გუნდის ათიანის შენარჩუნება არ სურს და ახალი შემტევის დამატებას ითხოვს. შესაბამისად, მარტივად შეგვიძლია იმის თქმა, რომ რაფაელ ლეაუს მილანური ისტორია ბოლო დღეებს ითვლის და ძალიან მალე პორტუგალიელს ახალი კლუბის მაისურით ვიხილავთ.
დაინტერესებული კლუბების და მილანის პოზიცია
მილანი რაფაელ ლეაუს დაახლოებით €50 მილიონად აფასებს, თუმცა არსებობს შანსი, რომ იტალიურმა გრანდმა პორტუგალიელი ფეხბურთელი €45 მილიონადაც გაყიდოს.
დაზუსტებით შეგვიძლია იმის თქმა, რომ ლეაუს ტრანსფერზე ორი კლუბი მუშაობს, კერძოდ, ასტონ ვილა და გალათასარაი. თურქული კლუბი პორტუგალიელ ფეხბურთელს წელიწადში ხელფასის სახით დაახლოებით €10/12 მილიონს სთავაზობს, თუმცა მხარეები სატრანსფერო თანხაზე შეთანხმებას ამ დრომდე ვერ ახერხებენ.
რაც შეეხება ასტონ ვილას, უნაი ემერის ახალი ვინგერის დამატება სურს და ესპანელ სპეციალისტს ლეაუს კანდიდატურა ძალიან მოსწონს. ამ მომენტისთვის ბირმინგემელები ახალი ფორვარდის ტრანსფერზე მუშაობენ და სატრანსფერო ბიუჯეტის დიდი ნაწილი სწორედ ამ პოზიციის გასაძლიერებლად აქვთ გადადებული. სწორედ ამიტომ, ამ მომენტისთვის უცნობია, რამდენად მოახერხებს ასტონ ვილა €50 მილიონის გადახდას.
ფეხბურთელთან დაახლოებულ წყაროებს თუ დავუჯერებთ, ლეაუ როგორც გალათასარაიში, ისე ტოტენჰემში თამაშის შესაძლებლობას სერიოზულად განიხილავს
ევროპის ტოპ ლიგებში სატრანსფერო ფანჯარა 1 სექტემბერს იხურება, შესაბამისად, უახლოეს საათებში ლეაუს თაობაზე კონკრეტულ ნაბიჯებს ველოდებით.
