პორტუგალიური გამოცემები გიორგი ქოჩორაშვილის შესახებ ახალ ინფორმაციას ავრცელებენ — ქართველი ნახევარმცველი ზაფხულის სატრანსფერო ფანჯრის პერიოდში, დიდი ალბათობით, სპორტინგს დატოვებს და შესაძლოა ესპანეთში დაბრუნდეს.
ზემოხსენებული გამოცემების ინფორმაციით, 26 წლის ფეხბურთელით ლა ლიგის 3-4 კლუბი ინტერესდება, თუმცა მისი დამატების ყველაზე რეალური შანსი მის ყოფილ გუნდს, ლევანტეს აქვს. როგორც იწერება, სპორტინგი მზად არის ქართველი ფეხბურთელი ერთწლიანი იჯარით გაუშვას, რაც ლევანტესთვის სრულიად მისაღები ვარიანტია.
გიორგი ქოჩორაშვილმა 2025/26 წლების სეზონში სულ 26 მატჩში მიიღო მონაწილეობა და მოედანზე 970 წუთი დაჰყო. ქართველმა ნახევარმცველმა ამ დროის განმავლობაში ორი საგოლე გადაცემა შეასრულა.
ზაფხულის სატრანსფერო ფანჯრის მოახლოებასთან ერთად, ქოჩორაშვილის მომავალთან დაკავშირებით უფრო მეტი დაზუსტებული ინფორმაცია გახდება ცნობილი.
