განვლილი გზა
ბარსელონამ ნახევარფინალში გასვლამდე გადალახა ვალენსიას, რეალ ბეტისისა და უნიონ დეპორტივა ბარბასტროს ბარიერი. რაც შეეხება ატლეტიკოს განვლილ მეტოქეებს: ელჩე, მარბელა და კასერენო. "ბლაუგრანასა" და მადრიდელების საპასუხო მატჩი შედგება 2 აპრილს, მათ შორის მოგებული კი ფინალში რეალ მადრიდსა და სოსიედადს შორის ერთ-ერთს შეხვდება.
შეგახსენებთ იმასაც, რომ კატალონიური გუნდი და "როხიბლანკო" ერთმანეთის კონკურენტები არიან არა მხოლოდ კოპა დელ რეიზე, არამედ ლა ლიგაშიც. 25 ტურის შემდეგ, "ლურჯ-ბროწეულისფრები" 54-54 ქულით ლიდერობას იყოფენ "სამეფო კლუბთან" ერთად, შემდეგ კი მოდიან "ინდიელები", რომლებსაც 1 ქულით ნაკლები აქვთ.
ამჟამინდელი მდგომარეობა
ბარსელონას დღევანდელ შეხვედრაში ტრავმის გამო დააკლდება სამი ფეხბურთელი - მარკ-ანდრე ტერ შტეგენი, ანდრეას კრისტენსენი და მარკ ბერნალი. ატლეტიკოს კი კოკე რესურესიონი არ ეყოლება. "ბლაუგრანა" და დედაქალაქელები მიმდინარე სეზონში ერთხელ უკვე შეხვდნენ: პრიმერა დივიზიონის მე-18 ტურში კატალონიელებმა მადრიდელებთან შინ 1:2 წააგეს.
ზოგადად კი ეს იქნება აღნიშნული გუნდების რიგით 244-ე დაპირისპირება - იქამდე 110-ჯერ იმარჯვეს "ლურჯ-ბროწეულისფრებმა", 77-ჯერ - "როხიბლანკომ", 56 მატჩი კი ფრედ დასრულდა. ამ დუელის საუკეთესო გოლეადორი არის ლეო მესი, რომელმაც დედაქალაქელებს სხვადასხვა დროს 32 ბურთი გაუტანა.
