1 აგვისტოს ჩვენი დროით 19:30 საათიდან, ბულგარეთის ქალაქ ბურგასში გაიმართება Brave-ის 107-ე ივენთი, სადაც მონაწილეობას მიიღებს ორი ქართველი მებრძოლი: საღამოს თანამთავარ ჩხუბში ბიძინა გავაშელიშვილის მოწინააღმდეგე იქნება ლუთანდო ბიკო, უფრო ადრე კი პრელიმზე, რიგით მე-3 ბრძოლაში ბაჩუკი ჭიკაიძეს ელის დუელი ანტონ იანჩევთან.
როგორც გვახსოვს, გავაშელიშვილისა და მისი სამხრეთ აფრიკელი მეტოქის ბრძოლა უნდა შემდგარიყო 2024 წლის მაისში, თუმცა გარკვეული მიზეზების გამო, ჩხუბი გაუქმდა. ჩაშლილი დუელის შემდეგ, "შორთიმ" 1 დაპირისპირება მოიგო, 2 კი წააგო. ზოგადად კი მის ანგარიშზე 13 გამარჯვება და 5 მარცხი არის.
რაც შეეხება ბიძინას, 15 მოგება და 4 წაგება. როგორც ცნობილი ხდება, მათ შორის გამარჯვებული უმსუბუქესი წონითი დივიზიონის ჩემპიონობისთვის, მუჰამედ მოკაევთან იჩხუბებს. ჭიკაიძისთვის ეს იქნება პირველი ბრძოლა, რომელსაც ის საქართველოს ფარგლებს გარეთ ჩაატარებს. ბაჩუკის ანგარიშზეა 2/2 მოგება, მურად მურადლისა და მეჰმეთ იოზგენელთან. გავაშელიშვილის ჩხუბი შედგება 57 კილოგრამ წონით დივიზიონში, ჭიკაიძის კი 70-ში.
