ხულიან ალვარესის სატრანსფერო საგაში ატლეტიკო მადრიდმა კიდევ უფრო მკაფიო პოზიცია დააფიქსირა. კლუბის დირექტორთა საბჭომ ერთხმად დაუჭირა მხარი ხელმძღვანელობის გადაწყვეტილებას და ოფიციალურად დაადასტურა, რომ არგენტინელი თავდამსხმელის ბარსელონაში ტრანსფერზე კატალონიურ კლუბთან მოლაპარაკებებს არ გამართავს.
ეს განცხადება განსაკუთრებით მნიშვნელოვანია იმ ფონზე, რომ ჟოან ლაპორტამ სულ რამდენიმე საათით ადრე კიდევ ერთხელ დაადასტურა ბარსელონას ინტერესი და აღნიშნა, რომ კლუბის შეთავაზება სატრანსფერო ფანჯრის დახურვამდე ძალაში დარჩება.
"ატლეტიკო მადრიდის დირექტორთა საბჭოს წევრებმა ერთხმად გამოხატეს სრული მხარდაჭერა კლუბის გადაწყვეტილების მიმართ, რომ ხულიან ალვარესის ბარსელონაში ტრანსფერზე მოლაპარაკებები არ დაიწყოს. ატლეტიკო ღიაა სატრანსფერო ბაზრის ფარგლებში მოლაპარაკებებისთვის, თუმცა ამას ყოველთვის პროფესიონალური, ეთიკური და კლუბებს შორის პატივისცემაზე დაფუძნებული გზით აკეთებს. ჩვენ სრულად ვუჭერთ მხარს კლუბის მიერ აქამდე დაფიქსირებულ პოზიციას, რომლის მიხედვითაც ბარსელონამ ეს მოთხოვნები ვერ დააკმაყოფილა. შესაბამისად, ალვარესის ტრანსფერზე მოლაპარაკებები არ ყოფილა და არც იქნება“ — ნათქვამია ატლეტიკოს მადრიდის ოფიციალურ განცხადებაში.
მადრიდული კლუბი ამასთანავე აცხადებს, რომ ალვარესი გადაწყვეტილებას გაიგებს და გუნდის მიზნებზე კონცენტრირებას გააგრძელებს. არგენტინელის მომავალზე კი კვლავ აქტუალურია სხვა სცენარები — მის მიმართ ინტერესს არსენალი ინარჩუნებს, თუმცა ამ ეტაპზე თავად ფეხბურთელს ლონდონში გადასვლა არ სურს. შესაბამისად, სატრანსფერო ფანჯრის დახურვამდე სულ რამდენიმე დღით ადრე ალვარესის ბარსელონაში გადასვლის გზა ატლეტიკომ პრაქტიკულად საბოლოოდ ჩაკეტა.
