გავლენიანი ევროპული გამოცემები ენტონი გორდონის შესახებ ახალ ინფორმაციას ავრცელებენ — როგორც ირკვევა, ინგლისელ ფეხბურთელს კარიერის გაგრძელება მხოლოდ ბარსელონაში სურს, რის გამოც ბაიერნთან და პრემიერ ლიგის ორ კლუბთან მოლაპარაკებები დროებით შეჩერებულია.
ენტონი გორდონი, რომ ნიუკასლის დატოვებას გეგმავდა, ამის შესახებ რამდენიმე კვირის წინ უკვე გაცნობეთ. ინგლისელი შემტევის ტრანსფერზე მუშაობა თავდაპირველად ბაიერნმა დაიწყო, მოგვიანებით კი საქმეში პრემიერ ლიგის კლუბებიც ჩაერთვნენ. ყველაზე ბოლოს ბარსელონა გააქტიურდა და როგორც ჩანს, ამ ეტაპზე სწორედ კატალონიელები ითვლებიან ფავორიტებად.
მიუხედავად იმისა, რომ გორდონის სატრანსფერო ღირებულება საკმაოდ მაღალია, ბარსელონა ყველაფერს გააკეთებს, რათა 25 წლის ფეხბურთელის ტრანსფერი დახუროს. ჰანსი ფლიკისა და დეკუს აზრით, გორდონის დამატებით "ბლაუგრანას" შეტევა საგრძნობლად გაძლიერდება.
ედი ჰაუს განცხადებით, ენტონი გორდონი ზაფხულის სატრანსფერო ფანჯრის პერიოდში ნიუკასლს დატოვებს, რაც იმას ნიშნავს, რომ უახლოეს კვირებში ინგლისელი ფეხბურთელის შესახებ კიდევ უფრო მეტი ინფორმაცია გახდება ცნობილი.
