დიდი სლემების ისტორიაში ყველაზე ხანგრძლივი 1/4 ფინალი - ლეგენდარულმა ჩოგბურთელმა ნოვაკ ჯოკოვიჩმა კანადელი ოჟე-ალიასიმი უიმბლდონის ტურნირზე ხუტ სეტში დაამარცხა და ნახევარფინალის საგზური მოიპოვა, სადაც იანიკ სინერს დაუპირისპირდება.
მეორდება წლევანდელი ავსტრალიის ღია პირველობის სცენარი - ჯოკოვიჩი და სინერი კვლავ ნახევარფინალში, კვლავ ერთმანეთის წინააღმდეგ. იქ სერბმა იტალიელი ხუთ სეტში დაამარცხა.
რა არის 39 წლის ჯოკოვიჩის ასეთი კარგი ფორმის და წარმატების მთავარი საიდუმლო? - 2022 წლის შემდეგ, მუხლის ტრავმის გამო, ფედერერმა ჩოგანი ლურსმანზე დაკიდა, ტრავმების გამო ჩოგბურთიდან რაფაელ ნადალი და ენდი მარიც წავიდნენ, მაგრამ ჯოკოვიჩი კვლავ აქაა და გულშემატკივრის გაოცებას განაგრძობს.
მას შემდეგ, რაც ბოსნიელი დიეტოლოგი იგო ჩეტოევიჩი ჯოკოვიჩს 2010 წელს შეუერთდა, ჩოგბურთელი ზედმიწევნით აკონტროლებს თავის დიეტას, სხეულსა და გონებას.
"ახლა გამოჯანმრთელებისთვის დრო გაცილებით მეტია, ვიდრე აქამდე. ყოველთვის ვეძებდი გზას, რაც სხვებთან შედარებით უპირატესობას მომცემდა. ვეყრდნობოდი ბიოჰაკინგს,კონტრასტულ აბაზანებს, წითელი სინათლის თერაპიას, ჰიპერბარიულ კამერებს, კრიოთერაპიას...“, - ამბობს ჯოკოვიჩი.
კარიერის გასახანგრძლივებლად გლუტენის გარეშე დიეტა მოიცავს ბოსტნეულს, ლობიოს, თეთრ ხორცს, თევზს, ხილს, თხილს, მარცვლეულს, მუხუდოს, ოსპს და ჯანსაღ ზეთებს.
სანამ დანარჩენი მონაწილეები ტურნირის განმავლობაში რესტორანს ინახულებენ, ბალკანელი ათლეტი სახლში მომზადებული და პლასტმასის კონტეინერში შენახული საკვებით მოდის.
დიდი სლემის 24-გზის ჩემპიონს გუნდში ფიზიოთერაპევტი მილან ამანოვიჩი ჰყავს, რომელიც მას ბოლო ათი წლის განმავლობაში მეთვალყურეობდა.
ორი წლის წინ ჯოკოვიჩმა სასწაული მოახდინა, რომლის მიღწევაც მხოლოდ მას შეეძლო. საფრანგეთის ღია პირველობის დროს მას მუხლის მენისკის რღვევის გამო ოპერაცია ჩაუტარდა, სამი კვირის შემდეგ კი უიმბლდონზე იასპარეზა, სადაც ფინალში კარლოს ალკარასთან დამარცხდა. მოგვიანებით, მან პარიზის ოლიმპიურ თამაშებზე ოლიმპიური ოქროს მედლის მოგებით რევანში აიღო.
ჯოკოვიჩს 2026 წლის უიმბლდონზეც სერიოზული გამოცდა ელის. 10 ივლისს, ნახევარფინალური მატჩი მსოფლიოს პირველი ჩოგნის, იანიკ სინერის წინააღმდეგ.
