"ფეხბურთი მარტივი თამაშია. 22 კაცი დასდევს ბურთს 90 წუთის განმავლობაში, თუმცა ბოლოს, მაინც გერმანელები იმარჯვებენ", - გარი ლინეკერის ცნობილი ფრაზა, რომელიც მან თქვა გერმანიის ეროვნულ გუნდზე, იტალიის მუნდიალის 1/2 ფინალში წაგების შემდეგ. იმ დროს ეს სიტყვები იყო ნამდვილად რელევანტური, რადგან 1974-1990 წლების შუალედში, "ბუნდესთიმმა" 5 შესაძლო ფინალიდან 4-ში ითამაშა.
ჩვენ ვსაუბრობთ ნაკრების შესახებ, რომელზე ტიტულოვანიც მსოფლიო ჩემპიონატზე მხოლოდ ბრაზილია არის. ერთ კომპონენტში "მანშაფტი" "სელესაოზე" შედეგიანიც კი არის. ვგულისხმობთ მუნდიალებზე მედლების საერთო რაოდენობას და გერმანიას ასეთი ჯილდო აქვს 12 - 4 ოქრო, 4 ვერცხლი და 4 ბრინჯაო.
ერთი სიტყვით, "ბუნდესნაკრებმა" მსოფლიო ჩემპიონატზე დატოვა უდიდესი მემკვიდრეობა, თუმცა რა მოცემულობა გვაქვს თანამედროვე ეპოქაში? ჯგუფში ზედიზედ 2-ჯერ ჩარჩენა რუსეთისა და კატარის მუნდიალებზე, აშშ-ს ტურნირზე კი წაგება პარაგვაისთან 11-მეტრიანების სერიაში, 1/16 ფინალში.
უკვე 12 წელია, რაც "მანშაფტი" მსოფლიო ჩემპიონატის 16 საუკეთესო ნაკრებს შორის ვერ ხვდება. ყველაზე დიდ კრიზისად აქამდე ითვლებოდა 1994-1998 წლების შუალედი, როცა გერმანიამ ზედიზედ 2 მუნდიალზე 1/4 ფინალში წააგო. დღეს, გერმანია თავისი ეროვნული გუნდის ყველაზე ცუდი ვერსიისგანაც კი ძალიან შორსაა.
