ედინ ჯეკოს 2026 წელი ჰგავს ზღაპარს - სერია ა-ში წარუმატებელი დაბრუნების შემდეგ, ზამთრის სატრანსფერო ფანჯრის პერიოდში ის ფლორენციის ფიორენტინადან გადაბარგდა გელზენკირხენის შალკეში, რომლის შემადგენლობაში ბოსნიელმა ფორვარდმა სეზონის დარჩენილ ნაწილში 11 შეხვედრაში 6 გოლისა და 3 ასისტის გაფორმება მოასწრო.
მილანის ინტერის ყოფილმა თავდამსხმელმა "მაღაროელებში" გადასვლისთანავე დაამყარა რეკორდი - სადებიუტო მატჩში კაიზერსლაუტერნის წინააღმდეგ გატანილი ბურთით, ის გახდა ყველაზე ასაკოვანი გოლის ავტორი გერმანიის მე-2 ლიგის ისტორიაში. ფელტინს არენას მკვიდრთა მე-10 ნომერი იმ მომენტისთვის 39 წლის, 10 თვისა და 8 დღის იყო.
"წითლების" წინააღმდეგ გატანილი გოლის შემდეგ, "გედმა" მეტოქეების კარი აიღო კიდევ ხუთჯერ, რითაც თავისი რეკორდი უფრო გააუმჯობესა. შალკემ გერმანიის მე-2 ლიგაში სეზონი დაასრულა 1-ელ პოზიციაზე და უმაღლეს დივიზიონში ადგილიც მოიპოვა. დიახ, 2011-ში, ვოლფსბურგიდან წასვლის შემდეგ, 40 წლის ფორვარდს გერმანული ფეხბურთის ელიტაში კვლავ ვიხილავთ.
საინტერესოა, რომ ჯეკო "მგლების" წინააღმდეგ ვერ ითამაშებს ბუნდესლიგაში, რადგან მისი ყოფილი გუნდი ქვედა დივიზიონში დაქვეითდა. ერთი სიტყვით, საკლუბო ასპარეზზე ბოსნიელი ფორვარდი განიცდის მეორე ახალგაზრდობას, მაგრამ ცალკე გამოსარჩევია ის, თუ რა მოხდა მის საერთაშორისო კარიერაში
დავიწყოთ თავიდან - მსოფლიო ჩემპიონატის პლეიოფის ნახევარფინალი უელსის ნაკრების წინააღმდეგ, სადაც ბოსნიის ეროვნული გუნდი მარცხდებოდა 86-ე წუთამდე, მაგრამ ედინის გოლით თამაშში დაბრუნდა და 11-მეტრიანებში მოგებულიც გამოვიდა. რაც შეეხება პლეიოფის გადამწყვეტ შეხვედრას, ბალკანელებმა იტალიას აჯობეს.
ისევ პენალტების სერია და "დრაკონების" თავგანწირული თამაში. ბოლომდე იბრძოლა "ნერაძურის" ყოფილმა თავდამსხმელმაც, ვინც მატჩი ხელის ტრავმით დაასრულა. დღეს, სერგეი ბარბარესის შეგირდები მუნდიალზე გამართავენ პირველ შეხვედრას, კანადის ეროვნულ გუნდთან, მოედანზე მათი მე-11 ნომერიც იქნება.
