ლა ლიგის მე-17 ტურში მადრიდის რეალმა საკუთარ კედლებში სევილია ანგარიშით 2:0 დაამარცხა. მასპინძლების მხრიდან გოლები ჯუდ ბელინგემმა და კილიან მბაპემ შეაგდეს. აღსანიშნავია, რომ ამ უკანასკნელს "სამეფო კლუბის" მაისურით ერთ კალენდარულ წელში დაუგროვდა 59 ბურთი, რითაც ფრანგმა ფორვარდმა კრიშტიანუ რონალდუს რეკორდი გაიმეორა.
პორტუგალიელმა თავდამსხმელმა 59 გოლი გაიტანა 2013 წელს და იმის შემდეგ, მისი მიღწევა 12 წლის განმავლობაში ხელშეუხებელი იყო. როგორც ვხედავთ, ბერნაბეუს ბინადრებს ამიერიდან ორი რეკორდსმენი ეყოლებათ. ალ ნასრის კაპიტნისთვის საბედნიეროდ, მონაკოს აღზრდილი ფორვარდი მის შედეგს 2025-ში ვეღარ გადაფარავს, რადგან ჩაბი ალონსოს გუნდმა წელს ბოლო შეხვედრა ჩაატარა.
რეალის უახლოესი მოწინააღმდეგე იქნება სევილიური ბეტისი, თუმცა აღნიშნული მატჩი 2026 წლის 4 იანვარს არის დაგეგმილი. რაც შეეხება მადრიდელთა მე-10 ნომრის ზოგად სტატისტიკას თეთრ მაისურში, 83 შეხვედრაში მან 73 ბურთის შეგდება მოასწრო.
