დღეს გაიმართება ჩემპიონთა ლიგის პირველი საკვალიფიკაციო ეტაპის შეხვედრა იბერიასა და ფლორას შორის. მოგეხსენებათ, ამ გუნდების პირველი მატჩი ესტონეთში შედგა და თბილისელთა გამარჯვებით 3:2 დასრულდა.
საქართველოს მოქმედი ჩემპიონი ერთ ნაბიჯშია, რომ პირველი ეტაპი გადალახოს და მინიმუმ კონფერენს ლიგის ფლეი-ოფის საგზური გაინაღდოს, რაც აქამდე არ მომხდარა,
იბერია პირველ შეხვედრაში უპირატესობას ფლობდა და იგრძნობოდა, რომ მეტოქეზე უკეთესი იყო, ამის დამტკიცებას კი ისინი მიხეილ მესხზე შეეცდებიან.
თუ იბერია ფლორას ბარიერას დაძლევს, მეორე ეტაპზე ისინი სლოვაკეთის მოქმედ ჩემპიონს, სლოვან ბრატისლავას შეხვდებიან.
ანდრიი დემჩენკო:"გუნდში ძალიან კარგი განწყობაა. მოსამზადებელი პროცესი წარმატებით წარიმართა და შეგვიძლია ვთქვათ, რომ ხვალინდელი მატჩისთვის 100%-ით მზად ვართ. პირველ შეხვედრაში გამარჯვებამ, რა თქმა უნდა, თავდაჯერება შეგვმატა, თუმცა ეს შედეგი უკვე წარსულს ეკუთვნის. ხვალ მოედანზე ისე გავალთ, თითქოს პირველი თამაში საერთოდ არ ყოფილა და ყველაფერი ნულიდან იწყება."
გიორგი ჯინჯოლავა:"გულშემატკივრის მხარდაჭერა ჩვენთვის ძალიან მნიშვნელოვანია. რაც უფრო მეტი ადამიანი იქნება სტადიონზე, მით უფრო დიდ მოტივაციას მოგვცემს და ეს ჩვენს თამაშზეც აისახება. იმედი მაქვს, ხვალ ბევრი გულშემატკივარი მოვა. გელოდებით ყველას მიხეილ მესხის სტადიონზე - თქვენი მხარდაჭერა ძალიან გვჭირდება. ვფიქრობ, სანახაობრივ ფეხბურთს ვთამაშობთ და ვიმსახურებთ, რომ გულშემატკივარი სტადიონზე მოვიდეს"
იბერია - ფლორა
ჩემპიონთა ლიგა, პირველი საკვალიფიკაციო ეტაპი
14 ივლისი, 20:00
მიხეილ მესხის სტადიონი, თბილისი
იბერიას სავარაუდო შემადგენლობა: მაკარიძე, ზოური, სელიმოვიჩი, ამისულაშვილი, დადიანი, ქარდავა, ბართიშვილი, ნაჭყებია, ბედოშვილი, სიხარულაშვილი
