ალ-ნასრი კავასაკი ფრონტეილთან დამარცხდა და აზიის ჩემპიონთა ლიგას გამოეთიშა. საინტერესოა, რომ კრიშტიანუ რონალდუს გადასვლის შემდეგ, რიადელებმა უკვე მე-10 ტიტული გაუშვეს ხელიდან. ამის გარდა, პორტუგალიელი ფორვარდის გუნდი კონტინენტის მთავარი საკლუბო ტურნირის ფინალშიც კი არ ყოფილა.
"ყვითლები" გასულ სეზონში დამარცხდნენ მეოთხედფინალში, წელს კი უკვე ნახევარფინალში. რაც შეეხება შიდა ჩემპიონატს, ზედიზედ ორი სეზონია, რაც ალ-ავალ პარკის ბინადრები გადიან მე-2 პოზიციაზე, მიმდინარე სეზონში კი ისინი ჯერჯერობით მე-3 ადგილზე არიან. რჩება თასი და სუპერთასი, რომელიც ალ-ნასრმა ასევე ვერ მოიგო.
რიადელთა კაპიტნის ერთადერთი მოგებული ტიტული საუდის არაბეთში არის არაბი ჩემპიონების თასი, თუმცა ეს ტურნირი ფორმალურ დატვირთვას ატარებს. აქვე დავამატებთ იმასაც, რომ "ყვითლების" მე-7 ნომერი თავის ამჟამინდელ კლუბში დიდი ალბათობით კიდევ 2 წლით დარჩება.
