ჩემპიონთა ლიგის განვლილი სეზონის ფინალში დაიბადა ახალი დიდი შვიდიანი - ხვიჩა კვარაცხელია, რომელმაც უმნიშვნელოვანესი როლი ითამაშა მილანის ინტერის განადგურებაში. ქართველ ვინგერთან ერთად, გავიხსენოთ მთავარი საკლუბო ტურნირის ფინალის მონაწილე სხვა მე-7 ნომრები, რომლებმაც გოლი გაიტანეს და თასი აღმართეს.
ჯორჯ ბესტი - ჩემპიონთა თასის მთავარი როკ ვარსკვლავი
ადამიანი, რომელმაც ფეხბურთელობასა და როკ ვარსკვლავის ცხოვრების წესს შორის ტოლობის ნიშანი დასვა. ბესტის საფეხბურთო მოედნის გარეთ არსებულ თავგადასავლებს არ ჩავუღრმავდებით, უბრალოდ გავიხსენებთ 1968 წლის ფინალს, რომელშიც მანჩესტერ იუნაიტედმა ბენფიკა ლისაბონი 4:1 გაანადგურა.
"წითელი ეშმაკებისა" და "არწივების" მატჩის ძირითადი დრო დასრულდა 1:1, რის შემდეგაც პორტუგალიელების განადგურება დამატებით დროში სწორედ ჯორჯმა დაიწყო. მის მიერ შეგდებულმა ბურთმა მეტ ბასბის შეგირდებში მოახდინა გარდატეხა, ეშტადიუ და ლუშის დემორალიზებულმა ბინადრებმა მეტოქესთან ვეღარაფერი გააწყეს და კიდევ 2 გოლი გაუშვეს.
უკანასკნელ თვეებში ხშირად გვესმის, თუ როგორ ჰგავს კვარაცხელია თამაშის სტილით ჩრდილოეთ ირლანდიელ გარემარბს. სიმბოლურია, რომ მთავარი საკლუბო ტურნირის ფინალების დიდ 7-ნომერთა სია სწორედ "ოცნებათა თეატრის" ბინადრების ლეგენდარული ვინგერით იწყება.
კენი დალგლიში - უდიდესი შვიდიანი ლივერპულის ისტორიაში
დალგლიშამდე, ლივერპულს კევინ კიგანის სახით უკვე ჰყავდა ერთი დიდი შვიდიანი, თუმცა მას ჩემპიონთა თასის ფინალში გოლი არ გაუტანია. ინგლისელი ფორვარდის მემკვიდრე კენიმ კი ეს შეძლო 1977 წელს, როდესაც მერსისაიდელებმა მისი ერთადერთი ბურთით ბრიუგეს მოუგეს.
შოტლანდიელი თავდამსხმელი "წითლებთან" ერთად მოგვიანებით ჩემპიონობას იზეიმებს კიდევ ორჯერ, თუმცა ამჯერად უკვე ფინალში გატანილი ბურთების გარეშე. ამის მიუხედავად, ენფილდის ბინადრების ლიდერის გავლენა თავისი გუნდის წარმატებაზე უბრალოდ უდიდესი იქნება.
რაულ გონსალესი - ჩემპიონთა ლიგის მეფე, მესი-რონალდუს ეპოქამდე
დიახ, მესისა და რონალდუს გამოჩენამდე, ჩემპიონთა ლიგას ჰყავდა ერთი მეფე - რაული. სწორედ ის იყო ევროპის ყველაზე პრესტიჟული საკლუბო ტურნირის მთავარი გოლეადორი და ფინალების ყველაზე ხშირი მონაწილეც. თავად განსაჯეთ: გონსალესმა მადრიდის რეალთან ერთად მოიგო 3 ფინალი, აქედან 2-ში მან გოლიც შეაგდო.
ესპანელმა თავდამსხმელმა დასვა საბოლოო წერტილი ვალენსიას განადგურებაში 2000 წელს, მოგვიანებით კი მან ლევერკუზენის ბაიერსაც შეუგდო. ზინედინ ზიდანის შედევრამდე, გერმანული კლუბის კარი პირველმა სწორედ "სამეფო კლუბის" აღზრდილმა მომავალმა კაპიტანმა აიღო.
ანდრეი შევჩენკო - ლეგენდად ქცეული გამოხედვა, გამორბენი და დარტყმა
მილანი დომინირებდა 1980-იანი წლების უკანასკნელ პერიოდსა და 1990-იანების დასაწყისში, რასაც შემდეგ დაღმასვლა მოჰყვა. მწვერვალზე დაბრუნება კი მოხდა 2003-ში, ტურინის იუვენტუსთან მოგებული ფინალით. ძირითად დროში დაფიქსირებული უგოლო ფრეს შემდეგ, "როსონერიმ" მეტოქეს 11-მეტრიანებში აჯობა.
გადამწყვეტი პენალტის დარტყმის მისია საკუთარ თავზე აიღო შევჩენკომ, რომელმაც ჯანლუიჯი ბუფონი უბრალოდ უშანსოდ დატოვა. გამოხედვა, გამორბენი, დარტყმა... ანდრეის შესრულებაში ლეგენდარულია აბსოლუტურად ყველა დეტალი. აღსანიშნავია ისიც, რომ 2 წლის შემდეგ, უკრაინელმა ფორვარდმა ვეღარ გაიმეორა იგივე ხრიკი, ამჯერად უკვე ირჟი დუდეკის წინააღმდეგ.
დავიდ ვილა - გუარდიოლას ბარსელონას ბოლო დეტალი სრულყოფილებისთვის
გუარდიოლას ბარსელონამ 2000-იანი წლების ბოლოს თავისი ტიკი-ტაკათი საფეხბურთო სამყაროში მოახდინა ფურორი, თუმცა სრულყოფილებამდე მას აკლდა ერთი დეტალი: მესისთვის იდეალური პარტნიორი შეტევაში. ზლატან იბრაჰიმოვიჩმა ვერ მოირგო ეს როლი, რის შემდეგაც კატალონიელებმა ვილა გაიფორმეს.
შვედი თავდამსხმელისგან განსხვავებით, დავიდმა პეპის მითითებები შეასრულა იდეალურად და "ბლაუგრანაში" დამკვიდრებაც მოახერხა. ესპანელი ფორვარდის კარიერის საუკეთესო მომენტი კამპ ნოუს ბინადრებთან ერთად? ულამაზესი ბურთი მანჩესტერის კარში მთავარი საკლუბო ტურნირის ფინალში, 2011 წელს.
კრიშტიანუ რონალდუ - ჩემპიონთა ლიგის მარადიული მეფე
ფეხბურთელი, რომელიც იქცა ჩემპიონთა ლიგის სინონიმად. ევროპის ყველაზე პრესტიჟული საკლუბო ტურნირის ყველა დროის საუკეთესო გოლეადორი და მისი 5-გზის ტრიუმფატორი. რონალდუ ევროპის თასს 4-ჯერ დაეუფლა რეალში, ერთხელაც კი მანჩესტერში, კარიერის სტარტზე.
როდესაც საუბარი გვაქვს კრიშტიანუს შესახებ, რთულია ერთი კონკრეტული ფინალის გამოყოფა - ლონდონის ჩელსისთან თავური, პენალტი მეზობელი ატლეტიკოს კარში, იუვეს დემორალიზებ,ა თუ რომელიმე სხვა მომენტი? ეს ყველაფერი გემოვნების საკითხია, ფაქტი კი არის ის, რომ პორტუგალიელი ფორვარდი მთავარი საკლუბო ტურნირის მარადიულ მეფედ დარჩა.
ხვიჩა კვარაცხელია - ახალი ვარსკვლავის დაბადება
კვარაცხელიას ადარებენ ბესტს, მისი საყვარელი ფეხბურთელი კი რონალდუა. იქმნება ისეთი შთაბეჭდილება, თითქოს მან გარკვეული დეტალები გადმოიღო როგორც ჯორჯისგან, ისე კრიშტიანუსგანაც. ამ ყველაფერმა მოგვცა მთავარი საკლუბო ტურნირის ფინალში ახალი ვარსკვლავის დაბადების ფაქტი.
ჩემპიონთა ლიგის უკანასკნელ ფინალში პარის სენ-ჟერმენმა უბრალოდ მიწასთან გაასწორა ინტერი და ამ ყველაფერს ხვიჩას მონაწილეობის გარეშე არ ჩაუვლია. მილანელთა კარში 5 გატანილი ბურთიდან 1 არის სწორედ ქართველი ვინგერის ანგარიშზე და აღსანიშნავია ისიც, რომ ამ გოლით მან ლომბარდიელებთან დაასრულა ის მშრალი სერია, რომელიც 6 შეხვედრის მანძილზე გრძელდებოდა.
სხვა შვიდიანები
ზემოაღნიშნული დიდი შვიდეულის გარდა, იყვნენ სხვა შვიდიანებიც, რომლებმაც ჩემპიონთა ლიგის ფინალში გაიტანეს გოლი და ტიტულიც მოიგეს. დავბრუნდეთ ისევ ჩემპიონთა თასის ეპოქაში, 1965 წელს, როდესაც ინტერნაციონალე მთავარი საკლუბო ტურნირის ტრიუმფატორი ზედიზედ მეორედ გახდა.
მილანელებმა ფინალში დაამარცხეს ბენფიკა, ჟაირ და კოსტას ერთადერთი გოლით. ერთი წლის შემდეგ, მორიგი შვიდიანის დამსახურებით ტიტული დაიბრუნა რეალმა: ბელგრადის პარტიზანს ჩემპიონობის მომტანი ბურთი ფერნანდო სერენამ შეუგდო. ეს ისტორია ვერ ჩაივლიდა ტრევორ ფრენსისის გარეშე, რომელმაც 1979 წელს ევროპის უძლიერესი კლუბის სტატუსი ნოტინგემ ფორესტს მოუტანა.
იყვნენ ისეთებიც, რომლებმაც იგივე შევჩენკოს მსგავსად, გოლები გაიტანეს პენალტების სერიაში - 1986 წელს, ბუქარესტის სტიაუას მხრიდან ბარსას კარი აიღო მარიუს ლეკეტუშმა, 5 წლის შემდეგ კი მარსელის ოლიმპიკისა და ბელგრადის ცრვენა ზვეზდას 11-მეტრიანების სერია რობერტ პროსინეჩკის ზუსტი დარტყმით გაიხსნა.
ბოლოს კი ვინისიუს ჟუნიორზეც ვისაუბროთ. დიახ, მან გაუტანა ჩემპიონობის მომტანი გოლი ლივერპულს, თუმცა იმ სეზონში ის მადრიდელთა მე-7 ნომერი არ ყოფილა. 2 წლის შემდეგ, ბრაზილიელმა ფორვარდმა შეუგდო დორტმუნდის ბორუსიასაც, მაგრამ ობიექტურად, არაფერი ეპიკური 2024 წლის ფინალში არ მომხდარა.
"სამეფო კლუბი" სრულიად დამსახურებულად ითვლებოდა გამოკვეთილ ფავორიტად და მატჩის მიმდინარეობისას ამ გუნდმა ეს სტატუსი უმარტივესად განამტკიცა. ბერნაბეუს ბინადრების 24 წლის ფორვარდი დავტოვეთ 7-ეულს მიღმა, მაგრამ არავის ეპარება ეჭვი იმაში, რომ ახალგაზრდა შემტევს თავისი ისტორიული ფინალი 7 ნომრით ზურგზე ჯერ კიდევ წინ აქვს.
