კრიშტიანუ რონალდუმ კვლავ გაიტანა, ამჯერად კურიოზულ ვითარებაში - ჟოაუ ფელიქსის დარტყმული ვეტერან თავდამსხმელს მოხვდა ზურგში, რის შედეგადაც ბურთმა შეიცვალა მიმართულება და ალ-იტიფაკის კარში შეგორდა. აღნიშნული შეხვედრა დასრულდა ფრედ, 2:2, პორტუგალიელმა ფორვარდმა კი წელი 41 გატანილი ბურთით დაასრულა.
ეს არის მე-14 შემთხვევა, როდესაც ალ-ნასრის კაპიტანმა კალენდარული წელიწადი 40-ზე მეტი გოლით დააგვირგვინა. შთამბეჭდავი შედეგია, მაგრამ რიადელთა მე-7 ნომრის ანგარიშზე 2025-ში ფიქსირდება პირადი ანტირეკორდიც: პირველად 2008 წლის შემდეგ მან წელი ჰეთ-თრიქის გატანის გარეშე დაასრულა.
რაც შეეხება 40 წლის თავდამსხმელის ზოგად სტატისტიკას, კარიერაში მას დაუგროვდა 957 გოლი, რაც ნიშნავს იმას, რომ 1000-ბურთიან ნიშნულამდე 43 ზუსტი დარტყმაა დარჩენილი. ვნახოთ, შეძლებს თუ არა რონალდუ 1000 გოლზე ასვლას 2026-ში.
