მილანის პორტუგალიელმა ფეხბურთელმა რაფა ლეაომ CBS Sports-თანინტერვიუში მასიმილიანო ალეგრიზე, მიმდინარე სეზონსა და ბევრ საინტერესო თემაზე ისაუბრა.
- ინტერთან მოახლოებული დერბიზე
"ყველა მოთამაშე ამ მატჩისთვის მზადაა. ეს დერბია და ინტერი შესანიშნავი გუნდია - კარგად ვიცით, რა დონის მატჩი გველოდება წინ. ჩვენთვის ეს შევხედრა ასევე შესაძლებლობაა, რომ ცხრილის სათავეში დავბრუნდეთ და ამისთვის ყველაფერს გავაკეთებთ."
- ახალ სეზონზე
"გასული წელი ძალიან რთული იყო... თითქოს ყველაფერი არასწორად წარიმართა.
წელს ბევრი ახალი მოთამაშე მოვიყვანეთ და ჩემი აზრით, კლუბში ყველამ შესანიშნავი სამუშაო გასწია. მათ მოიყვანეს შესანიშნავი სპორტული დირექტორი, რომელიც ძალიან კარგად მუშაობს, შეინარჩუნეს იბრაჰიმოვიჩი, რომელიც ჩვენთან ძალიან დიდ დროს ატარებს, გუნდში მოიყვანეს მასიმილიანო ალეგრი, რომელსაც დიდი გამოცდილება უმაგრებს ზურგს, გუნდში მოიყვანეს ლუკა მოდრიჩი, ფეხბურთის ლეგენდა და ა.შ. ვფიქრობ, ყველა ეს სვლა წარმატების გარანტია.
როგორც ხედავთ, ჩვენს გუნდში ბევრი ახალგაზრდა და გამოცდილი მოთამაშე შეიკრიბა, რომლებსაც ერთად წარმატების მიღწევა შეუძლიათ. მიუხედავად იმისა, რომ სეზონის ნახევარიც კი არ არის გავლილი, ჩვენ უკვე გვინდა კარგი შედეგების მიღწევა, მაგრამ ცხადია, ეტაპობრივად. კვირას შანსია, ვაჩვენოთ, რისი გაკეთება შეგვიძლია."
- მასიმილიანო ალეგრიზე
"მწვრთნელი ბევრ რამეს არ მთხოვს, უბრალოდ მითხრა: "იყავი თავისუფალი“ და ყველაზე მნიშვნელოვანი, იყავი კონცენტრირებული. მან კარგად იცის, რისი გაკეთება შემიძლია ბურთით და ისიც კარგად იცის, რომ შემიძლია გუნდს დავეხმარო ბურთის გარეშეც. ის უფრო მამას ჰგავს, რომელიც შვილს სთხოვს, რომ სკოლაში და ცხოვრებაში ყოველთვის უკეთესად ისწავლოს და იცხოვროს, ყველაფერი სწორად გააკეთოს. ყველა თამაშში თავს ბედნიერად და თავდაჯერებულად ვგრძნობ, რადგან ვიცი, რომ მას ჩემი იმედი აქვს. ის უბრალოდ მთხოვს, რომ გოლის შემდეგაც კი კონცენტრირებული ვიყო და არ გავჩერდე."
- ახალ პოზიციაზე
"სიმართლე გითხრათ, მომწონს ერთი-ერთზე სიტუაციები, ერთი, ორი ან სამი მცველის გვერდის ავლით თამაში, მაგრამ ვიცით, რომ ფეხბურთი შეიცვალა და ახლა სტატისტიკა უფრო მნიშვნელოვანია. მე გავიზარდე რობინიოს, რონალდინიოს, კუარეჟმასა და კრიშტიანუს ფეხბურთის ყურებით და ასეთი ტიპის მოთამაშეები ყოველთვის მაბედნიერებდნენ - როცა ვხედავდი თუ რას აკეთებდნენ ისინი მოედანზე, მეც მინდოდა იგივეს გაკეთება. თუმცა, დღეს ყველაზე მნიშვნელოვანი გოლების გატანაა, ამიტომ ჩემს ახალ, ამჟამინდელ პოზიციაზე ახლოს ვარ იმ მოთამაშეებთან, რომლებიც განსხვავებას ქმნიან მოედანზე. განსხვავება რითი იქმნება? გატანილი გოლებით და არა მხოლოდ დრიბლინგით.
ალეგრიმ შეცვალა ჩემი მენტალიტეტი და გოლის გატანასთან დამაახლოვა. ზოგჯერ, ფლანგზე თამაშისას, ძალიან შორს ვარ კარისგან და გოლის გატანა იქედან რთულია, მაგრამ თუ გინდა გუნდს ულიდერო, განსხვავება თავად უნდა შექმნა. და ასეთ დროს არ აქვს მნიშვნელობა რა პოზიციაზე თამაშობ.“
- კრისტიან პულისიკზე
"ვფიქრობ, ის შეიცვალა. როდესაც ჩელსიში და დორტმუნდში თამაშბდა, ის იყო ფლანგის მოთამაშე, რომელსაც უყვარდა დრიბლინგი, ერთი-ერთზე კაცის მოტყუება, ერთი ფლანგიდან მეორეზე გადასვლა, მაგრამ ახლა კრისტიანი სულ სხვანაირად თამაშობს. ის შესანიშნავი თვისებების მქონე მოთამაშეა, მაგრამ ასევე ძალიან ჭკვიანია და იმ პოზიციაზე, სადაც ახლა თამაშობს, მან იცის, როგორ იმოძრაოს და როგორ მოუტანოს გუნდს წარმატება. როდესაც მასთან ერთად ვთამაშობ, ვცდილობ, დავეხმარო და სივრცეები შევუქმნა. ის ჩვენთვის ძალიან მნიშვნელოვანია და ვფიქრობ, მატჩის მიმდინარეობისას ნებისმიერ დროს შეგვიძლია განსვავების შექმნა. მას, რა თქმა უნდა, შეუძლია მარჯვნივ ან მარცხნივ თამაში, ამიტომ მწვრთნელს მეტი არჩევანი აქვს - მისი სახით გუნდს ძალიან ძლიერი მოთამაშე ჰყავს."
- მამობაზე
"მას შემდგ, რაც ტყუპების მამა გავხდი, ვისწავლე, რომ უფრო კონცენტრირებული ვყოფილიყავი და ყოველი წამით მესიამოვნებინა. ისინი ძალას მაძლევენ. როდესაც ნეგატიური მომენტებია, მათზე ვფიქრობ, ვცდილობ გავაცნობიერო, როგორ შემიძლია უკეთესი გავხდე, როგორც მათთვის, ისე საკუთარი თავისთვისაც."
