მასიმილიანო ალეგრიმ მილანი გასულ კვირას დატოვა და მას შემდეგ იტალიური გრანდი ახალი მთავარი მწვრთნელის ძიებაში აქტიურადაა ჩართული. კლუბს არაერთი ცნობილი სპეციალისტი დაუკავშირეს, თუმცა ამ ეტაპზე საბოლოო გადაწყვეტილება ჯერ მიღებული არ არის.
გავრცელებული ინფორმაციით, მილანის ერთ-ერთი მთავარი სამიზნე იყო ანდონი ირაოლა, თუმცა ესპანელმა სპეციალისტმა შეთავაზებაზე უარი განაცხადა. ანალოგიური გადაწყვეტილება მიიღო ჩავი ერნანდესიმაც, რის გამოც "როსონერის“ ხელმძღვანელობას ალტერნატიული ვარიანტების მოძიება უწევს.
ამავდროულად, მილანი მხოლოდ მთავარი მწვრთნელის შერჩევაზე არ მუშაობს. კლუბი ახალი სპორტული დირექტორისა და აღმასრულებელი დირექტორის (CEO) მოძიებითაც არის დაკავებული. ერთ-ერთ მთავარ კანდიდატად სახელდება რალფ რანგნიკი, რომელსაც კლუბში მნიშვნელოვანი გავლენა ექნება და მწვრთნელის არჩევაშიც გადამწყვეტ როლს შეასრულებს. თუ რანგნიკი მილანში მივა, მის მთავარ ფავორიტად სახელდება ოლივერ გლასნერი, რომელმაც კრისტალ პალასი დატოვა, ხოლო ალტერნატიულ ვარიანტად განიხილება მატიას იაისლე, რომელიც ამჟამად ალ აჰლის მთავარი მწვრთნელია.
მილანის სიაში ასევე რჩება მაურისიო პოჩეტინოც, რომლის წარმომადგენლებთან კლუბის ხელმძღვანელობამ უკვე გამართა შეხვედრა. არგენტინელი სპეციალისტი ამჟამად ამერიკის შეერთებული შტატების ეროვნული ნაკრების მთავარი მწვრთნელია, თუმცა მუნდიალის დასრულების შემდეგ, დიდი ალბათობით საკლუბო ფეხბურთს დაუბრუნდება.
არსებული ცნობებით, კანდიდატთა სიაში კიდევ რამდენიმე სპეციალისტიც ფიგურირებს, თუმცა მათი ვინაობა ამ ეტაპზე არ საჯაროვდება.
მილანის მფლობელის, ჯერი კარდინალეს, სურვილია, რომ ახალი მთავარი მწვრთნელი, სპორტული დირექტორი და CEO არაუგვიანეს 10-14 ივნისისა უკვე შერჩეული იყვნენ. შესაბამისად, უახლოეს დღეებში "როსონერის“ გარშემო მიმდინარე პროცესებთან დაკავშირებით გაცილებით მეტი ინფორმაცია გახდება ცნობილი.
