კონფერენს ლიგის პირველ საკვალიფიკაციო ეტაპზე დინამო თბილისმა მონდოფრთან მძიმე გამარჯვება მოიპოვა და შემდეგ ეტაპზე გავიდა. ორი მატჩის ჯამში ქეცბაიას გუნდმა 3:2 გაიმარჯვა.
შემდეგ ეტაპზე გასვლის შემდეგ, დინამოელთა მთავარმა მწვრთნელმა პრესკონფერენცია გამართა.
"სამწუხაროა, რომ ძირითად დროში თამაში წავაგეთ. ბიჭების მონდომებით უკმაყოფილო არ ვარ, თუმცა უკმაყოფილო ვარ თამაშის ხარისხით. დაბალ ტემპში ვთამაშობდით, პასებს ვაგვიანებდით და ასეთ დროს, ყოველთვის არის საფრთხე, რომ გოლს შენს კარში მიიღებ. გამოჩნდა, რომ ევროტურნირებზე კარგად სათამაშოდ უფრო მეტია საჭირო.
მადლობა იმ გულშემატკივარს, ვინც სტადიონზე მოვიდა, მაგრამ არც ისე ბევრი ხალხი ყოფილა. ეროვნული ჩემპიონატი გასაგებია, მაგრამ როცა ქართული გუნდი ევროტურნირებზე თამაშობს, უფრო მეტი ხალხი უნდა მოდიოდეს.
თორნიკე კვარაცხელია დღითიდღე პროგრესირებს. ის უკვე 2 თვეა ჩვენთანაა და მომატებული აქვს. ძირითად შემადგენლობაშიც რომ ითამშოს, არავიზე ნაკლები არ იქნება.
რაც შეეხება მომავალ მეტოქეს, ჟალგირისი წინა მეტოქეზე უკეთესი გუნდია. კარგია, რომ პირველი მატჩი შინ გვაქვს, რადგან ისინი ხელოვნურ საფარიან მოედანზე თამაშობენ და ეს დისკომფორტი იქნება. მნიშვნელოვანია, რომ სახლში დადებითი შედეგი დავაფიქსიროთ", - განაცხადა ქეცბაიამ.
კონფერენს ლიგის მეორე საკვალიფიკაციო ეტაპის მატჩი დინამო თბილისსა და ჟალგირისს შორის, 23 ივლისს გაიმართება.
