დღეს უდინეზემ გიორგი ჩაკვეტაძის წარდგენის ოფიციალური პრესკონფერენცია გამართა, სადაც ქართველ ფეხბურთელთან ერთად მედიის კითხვებს კლუბის ხელმძღვანელებმაც უპასუხეს.
ფრანკო კოლავინო (უდინეზეს გენერალური დირექტორი): "ჩაკვეტაძე მაღალი კლასისა და საერთაშორისო გამოცდილების მქონე ფეხბურთელია. უოტფორდის მაისურით უკვე 100-ზე მეტი მატჩი აქვს ჩატარებული. კლუბის სახელით მსურს მას თბილად მივესალმო. იმედი გვაქვს, მალე დაძლევს ნაკრებში მიღებული ტრავმით გამოწვეულ მცირე პრობლემას და სრულ მზადყოფნაში იქნება.“
ჯანლუკა ნანი (ტექნიკური დირექტორი): "ძალიან ცოტა მეტოქე მინახავს, რომელსაც ჩაკვეტაძის შეჩერება შეეძლო. მისი ყველაზე დიდი პრობლემა ტრავმები იყო. ვფიქრობდით, რომ მისთვის ახალი ჩემპიონატის გამოცდა სწორი ნაბიჯი იქნებოდა და იმის ნაცვლად, რომ დაგვეკარგა, გადავწყვიტეთ უდინეზეში გადმოგვეყვანა.
როცა ბურთი ფეხებში აქვს, მისი შეჩერება ძალიან რთულია და ასეთი ფეხბურთელები იშვიათად გვხვდება. სათამაშო სტილით კაკას ჰგავს, შეუძლია ითამაშოს როგორც შემტევ ნახევარმცველად, ისე ცენტრალურ ნახევარმცველად და "ათიანის“ პოზიციაზეც."
გიოქან ინლერი (უდინეზეს სპორტული დირექტორი): "უოტფორდში არაერთხელ მინახავს მისი თამაში. მას აქვს სწორი მენტალიტეტი და საჭირო გამოცდილება. ძალიან ძლიერი ფეხბურთელია, რომელსაც უმაღლეს დონეზე თამაში შეუძლია. ყველაფერს გავაკეთებ, რომ საკუთარი შესაძლებლობები სრულად გამოავლინოს.“
გიორგი ჩაკვეტაძე: "ძალიან ბედნიერი ვარ უდინეზეში გადმოსვლით და მიხარია, რომ იტალიაში ვითამაშებ. სერია A-ში თამაში ჩემი ოცნება იყო. ძალიან ემოციური დღეა ჩემთვის. უდინეზე დიდი ისტორიის მქონე კლუბია და მის ნაწილად ყოფნა დიდი პატივია.
ჯანლუკა ნანიმ უდინეზეზე ბევრი კარგი რამ მომიყვა. მითხრა, რომ ეს ნაბიჯი ჩემს კარიერას ძალიან წაადგებოდა. უოტფორდს საუკეთესოს ვუსურვებ, შესანიშნავი გუნდია და იმედი მაქვს, პრემიერ ლიგაში დაბრუნებას შეძლებენ.
ყველაზე მეტად "ათიანის“ პოზიციაზე თამაში მიყვარს, თუმცა საჭიროების შემთხვევაში "რვიანადაც“ შემიძლია თამაში.
ტრავმა? რეაბილიტაცია ძალიან კარგად მიმდინარეობს, მალე სირბილსაც დავიწყებ. იმედი მაქვს, რამდენიმე კვირაში უკვე გუნდთან ერთად სრულფასოვან ვარჯიშსაც შევძლებ.
ახალი თანაგუნდელებიდან რომელს გამოვარჩევდი? ძალიან მომწონს ძანიოლო, ტექნიკური ფეხბურთელია. ასევე სოლე, რომელიც ძლიერი მცველია.
სერია A? ვფიქრობ, ძალიან ტაქტიკური ჩემპიონატია. აქ გადმოსვლამდე სერია A-ს ბევრი მატჩი ვნახე. აქ თამაში მარტივი არ არის, გუნდები ხშირად დაბალი ბლოკით და ხუთმცველიანი სისტემით იცავენ თავს. როგორც შემტევი ფეხბურთელისთვის, ეს საინტერესო და ამავდროულად დიდი გამოწვევა იქნება.
ჟურნალისტი: "ზუსტად 10 წლის წინ უდინეზემ როდრიგო დე პოლი წარადგინა. მისი სტილის ფეხბურთელი ხარ?"
გიორგი ჩაკვეტაძე: "მე უფრო შეტევაზე ვარ ორიენტირებული. მინდა რაც შეიძლება მეტი გოლი გავიტანო და მეტი საგოლე გადაცემა გავაკეთო.“
