საქართველოს ნაკრები ტოკიოს ოლიმპიადაზე 35 სპორტსმენით იყო წარმოდგენილი, რომლებიც მონაწილეობას სპორტის 11 სახეობაში იღებდნენ — მედროშეებად კი ოლიმპიური ჩემპიონები, ლაშა ტალახაძე და ნინო სალუქვაძე აირჩიეს.
ტოკიოს ოლიმპიურ თამაშებზე პირველი ოქროს მედალი ქართულმა დელეგაციამ 28 ივლისს, ძიუდოში მოიპოვა — 90 კგ. წონით კატეგორიაში უშეცდომოდ იასპარეზა ლაშა ბექაურმა და ოლიმპიური ჩემპიონი გახდა.
ლაშა ბექაურმა ფინალამდე საკმაოდ რთული ბადე გაიარა. შეჯიბრი მეორე წრიდან დაიწყო და პოლონელ კუზჩერას იპონით აჯობა, ხოლო შემდეგ, ასევე იპონით მოუგო ისრაელის წარმომადგენელს კოჩმანს. 1/4 ფინალში, უზბეკი ბობონოვი ტატამისკენ თავით წასვლისთვის მოხსნეს და ბექაური შემდეგ ეტაპზე გავიდა. 1/2 ფინალში 21 წლის ქართველმა ძიუდოისტმა რუსი იგოლნიკოვი ვაზარით დაამარცხა და ფინალის საგზური მოიპოვა.
90 კგ. წონითი კატეგორიის ფინალში, ლაშა ბექაურის მეტოქე მოულოდნელად გერმანელი ედუარტ ტრიპელი აღმოჩნდა, რომელმაც სერბი მაიდოვი, სამხრეთ კორეელი გვაკი, უნგრელი ტოტი და თურქი ჟგანკი დაამარცხა და ოქროსთვის ბრძოლის შანსი მიიღო. ფინალური დაპირისპირება ქართველი ძიუდოისტის უპირატესობით წარიმართა, ლაშა ბექაურმა მეტოქეს ვაზარით მოუგო და ოლიმპიური ჩემპიონი გახდა.
2020 ტოკიოს ოლიმპიადაზე საქართველოს ძიუდოისტთა ნაკრებმა ისტორიაში საუკეთესო შედეგი აჩვენა და 1 ოქროსთან ერთად 3 ვერცხლის მედალიც მოიპოვა. ქართველმა ძიუდოისტებმა 7 წონითი კატეგორიიდან 4-ში ფინალში იჭიდავეს, რაც ისტორიული შედეგია.
ლაშა შავდათუაშვილმა ტოკიოში ვერცხლის მედალი მოიპოვა და ოლიმპიური მედლების კომპლექტი შეკრა — მას კარიერაში სამივე სინჯის მედალი აქვს მოგებული. ვერცხლს დასჯერდა ვაჟა მარგველაშვილიც, რომელიც ფინალში უპირობო ფავორიტთან, იაპონელ ჰიფუმი აბესთან დამარცხდა.
მძიმე წონის ფინალში კი გურამ თუშიშვილი და ლუკაშ კრპალეკი დაუპირისპირდნენ ერთმანეთს. ფინალური ორთაბრძოლა თუშიშვილის სრული უპირატესობით მიმდინარეობდა, თუმცა, შეხვედრის მიწურულს, ჩეხმა ქართველის მცირე შეცდომით ისარგებლა და მეორედ გახდა ოლიმპიური ჩემპიონი, გურამ თუშიშვილი კი ვერცხლს დასჯერდა.
საქართველოს ნაკრებს აქტივში მეორე დაგეგმილი ოქროს მედალი 4 აგვისტოს შეემატა — როგორც მოსალოდნელი იყო, ლაშა ტალახაძე კარიერაში მეორედ გახდა ოლიმპიური თამაშების გამარჯვებული.
ძალოსნობის მძიმე წონაში, ლაშა ტალახაძემ ფავორიტის სტატუსი მაქსიმალურად გაამართლა და მარტივად დაეუფლა ოქროს მედალს. აღსანიშნავია, რომ ქართველმა ძალოსანმა 3 ახალი მსოფლიო რეკორდი დაამყარა — ატაცში 223 კგ., აკვრაში 265 კგ. და ორჭიდში 488 კგ.
საქართველოს ძალოსნობის ნაკრებმა, 2020 წლის ოლიმპიურ თამაშებზე ოქროს გარდა 1 ბრინჯაოს მედალიც მოიპოვა — 96 კგ. წონით კატეგორიაში მესამე ადგილზე ანტონ პლესნოი გავიდა.
ბერძნულ-რომაული სტილით ჭიდაობის მძიმე წონაში, ფინალში ასპარეზობის უფლება მიიღო იაკობ ქაჯაიამ, რომელმაც ერთმანეთის მიყოლებით ფინელი, რუსი და ჩილელი მოჭიდავეები დაამარცხა. ფინალში კი ვერაფერს გახდა 3-გზის ოლიმპიურ ჩემპიონთან, ლეგენდარულ კუბელ ლოპესთან და ვერცხლს დასჯერდა. ლოპესმა კი კარიერაში მე-4 ოლიმპიური ოქრო მოიგო.
დიდი მარცხი განიცადა თავისუფალი სტილით ჭიდაობის მძიმე წონის ფინალში გენო პეტრიაშვილმა, რომელიც ოლიმპიადაზე უშეცდომოდ ასპარეზობდა და ოქროსთვის ამერიკელ სტივენსოს შეხვდა. ფინალური დაპირისპირება ქართველის კარნახით მიდიოდა, იგებდა კიდეც და ორთაბრძოლის ბოლოს, როდესაც მხოლოდ 1 წამი იყო დარჩენილი, 2 ქულა გაუშვა და დამარცხდა.
ტოკიოს 2020 წლის ოლიმპიურ თამაშებზე საქართველოს ნაკრებმა საბოლოოდ 2 ოქროს, 5 ვერცხლისა და 1 ბრინჯაოს მედალი მოიპოვა და გუნდურ ჩათვლაში 33-ე ადგილი დაიკავა.
