დინამო თბილისს ქულები აუცილებლად სჭირდება, რათა ევროტურნირებისა და ჩემპიონობისთვის ბრძოლაში დაბრუნდეს. კარასკოს გუნდს ამჟამად მხოლოდ 14 ქულა აქვს და მე-5 ადგილს იკავებს.
თავის მხრივ, იბერია ბრწყინვალე ფორმაშია, გიორგი მიქაძის ხელმძღვანელობით გუნდი წარმატებულ მატჩებს ატარებს და 29 ქულით სატურნირო ცხრილის ლიდერია.
ტრავმის გამო, დინამოელებს თორნიკე ოქრიაშვილი დააკლდებათ, დისკვალიფიცირებულია კიკე ლოპესი. იბერიას მხრიდან მატჩს დისკვალიფიკაციის გამო ბაქარ ქარდავა გამოტოვებს.
ამ მატჩის დაწყებამდე, ეროვნულ ლიგაში კიდევ 3 შეხვედრა გაიმართება. ტური გაგრასა და სამტრედიას დაპირისპირებით გაიხსნება. შეიძლება ითქვას, ეს 6-ქულიანი თამაშია, რადგან გაგრა და სამტრედია ერთმანეთის უშუალო კონკურენტები არიან და გასავარდნი ზონიდან თავის დასაღწევად იბრძვიან. მატჩი 16:00 საათზეა ჩანიშნული.
19:00 საათზე, ასევე გამორჩეული შეხვედრა დილასა და ტორპედოს შორის შედგება. ეს გუნდები, იბერიასთან ერთად, ჩემპიონობისთვის იბრძვიან და ორივესთვის ქულები მნიშვნელოვანია. ტორპედო 19 ქულით მე-4 ადგილზეა, დილა კი 27 ქულით მეორე პოზიციას იკავებს. დისკვალიფიკაციის გამო დილას დრამე დააკლდება.
20:00 საათზე, ქობულეთში ფოთის კოლხეთი სამგურალს უმასპინძლებს და გამარჯვების შემთხვევაში, საგრძნობლად დასცილდება გასავარდნ ზონას. კოლხეთმა უშუალო კონკურენტებთან თამაშები კარგად ჩაატარა და თითქმის ყველა მოიგო. სამგურალისთვის ამ მატჩში ქულები ასევე მნიშვნელოვანია, რადგან გუნდი დასარჩენად იბრძვის.
ტური ხვალ, დინამო ბათუმისა და თელავის მატჩით დასრულდება. აღსანიშნავია, რომ რამდენიმე კვირიანი პაუზის შემდეგ, ბათუმი საკუთარ არენაზე ითამაშებს.
