რუსთავის მერიისა და ქინქლაძის ფონდის მხარდაჭერით, 2026 წლის 25-28 ივნისს, რუსთავის ახალ საფეხბურთო ბაზაზე საერთაშორისო ახალგაზრდული საფეხბურთო ფესტივალი Rustavi Grassroots Cup 2026 გაიმართება. ტურნირი, რომელიც Grassroots Cup Georgia-ს ორგანიზებით ტარდება, წელს უკვე მეშვიდედ აიღებს სტარტს.
ფესტივალი ერთ-ერთი ყველაზე მასშტაბური ბავშვთა საფეხბურთო ღონისძიებაა საქართველოში და წელს 96 ქართულ და უცხოურ გუნდს გააერთიანებს. ტურნირში მონაწილეობას მიიღებენ 2015, 2016, 2017 და 2018 წლებში დაბადებული ფეხბურთელები, ხოლო მონაწილეთა საერთო რაოდენობა 1700-1800 ახალგაზრდაა.
საერთაშორისო მონაწილეებს შორის წარმოდგენილი იქნებიან ცნობილი ევროპული და რეგიონული აკადემიები, მათ შორის პორტუგალიური „ბრაგა“, უკრაინული „დინამო კიევი“ და აზერბაიჯანული „ვატანი“. ოთხი დღის განმავლობაში დაგეგმილია 300-მდე მატჩის ჩატარება.
Rustavi Grassroots Cup-ის მთავარი მიზანია ახალგაზრდა ფეხბურთელებისთვის მაღალი დონის საერთაშორისო სათამაშო გამოცდილების შექმნა, სხვადასხვა ქვეყნის აკადემიებს შორის თანამშრომლობის გაღრმავება და ბავშვთა ფეხბურთის განვითარების ხელშეწყობა. ტურნირი მონაწილეებს შესაძლებლობას აძლევს შეხვდნენ განსხვავებული საფეხბურთო კულტურის წარმომადგენლებს, შეიძინონ საერთაშორისო გამოცდილება და საკუთარი შესაძლებლობები ძლიერ მეტოქეებთან გამოსცადონ.
ფესტივალის საზეიმო გახსნა 24 ივნისს, 20:00 საათზე გაიმართება. გახსნის ცერემონიის ფარგლებში მონაწილეებსა და დამსწრეებს სხვადასხვა სახალისო აქტივობები, გათამაშებები და პარტნიორი კომპანიების მიერ ორგანიზებული ჩელენჯები ელოდებათ.
Grassroots Cup 2026 კიდევ ერთხელ გააერთიანებს ასობით ახალგაზრდა სპორტსმენებს. Rustavi Grassroots Cup 2026-ის ყველა მატჩი და ფესტივალის მთავარი მოვლენები აქტიურად გაშუქდება როგორც ტრადიციულ, ასევე ციფრულ მედიაპლატფორმებზე.
გიორგი ქინქლაძე: მომავალი თაობის განვითარებაში ინვესტირება ყველაზე მნიშვნელოვანი საქმეა, რაც კი შეგვიძლია ფეხბურთის მომავლისთვის გავაკეთოთ. ქინქლაძის ფონდის სახელით, ჩვენ უზომოდ ვამაყობთ, რომ მხარს ვუჭერთ Grassroots Cup 2026-ს - ფესტივალს რუსთავში, რომელიც თავს უყრის 1800-მდე ახალგაზრდა ტალანტს 96 ქართული და უცხოური აკადემიიდან. ამ ამომავალი ვარსკვლავების წახალისებისა და მოტივაციის მიზნით, ჩვენმა ფონდმა სპეციალური პრიზები დააწესა და 4 ასაკობრივ ჯგუფში 4 საუკეთესო ფეხბურთელს გამოავლენს, რომლებსაც წამახალისებელ ჯილდოებს გადასცემს. ეს ტურნირი ემსახურება იმას, რომ ბავშვებს მიეცეთ ის უმნიშვნელოვანესი საერთაშორისო გამოცდილება, რაც მათ საკუთარი შესაძლებლობების გამოსაცდელად და გასაზრდელად სჭირდებათ. მოხარულები ვართ, რომ წვლილი შეგვაქვს მათ საფეხბურთო გატაცებაში და მოუთმენლად ველით დაუვიწყარ საფეხბურთო დღეებს. ასევე მინდა მადლობა გადავუხადო ჩემს პარტნიორებს SMH Sports ვისი დახმარებითაც “წყალი მთის” და “hubs.ge” ქინქლაძეს ფონდის ინიციატივას მხარ უჭერენ და ტურნირის განვითარებაში გვეხმარებიან".
