LaGazzetta.ge გთავაზობთ სავარაუდო შემადგენლობას, თუ როგორი იქნება ჩვენი ნაკრების შემადგენლობა ჩეხეთის წინააღმდეგ.
რა თქმა უნდა, ძირითადი ბირთვი იმ ფეხბურთელებისგან იქნება დაკომპლექტებული, ვინც ევროპის ჩემპიონატზე წარმატებით ითამაშეს.
მეკარე
განხილვაც არ სჭირდება იმას, თუ ვინ უნდა იყოს ეროვნული ნაკრების ძირითადი მეკარე. მსოფლიოს ერთ-ერთი გამორჩეული მეკარე გიორგი მამარდაშვილი აწ უკვე ლივერპულის ფეხბურთელის სტატუსით ვალენსიას კარში წელსაც დამაჯერებლად დგას და მზადაა ეს კარგი ფორმა საქართველოს ნაკრებშიც ჩამოიტანოს.
მცველები
ვილი სანიოლი ტრადიციულად 5 მცველით ითამაშებს. ოთარ კაკაბაძე წლებია მარჯვენა ფლანგზე ჩვენი ნაკრებს შეუცვლელი წევრია. მარჯვენა ცენტრალური მცველის პოზიციას გიორგი გველესიანი დაიკავებს, რომელმაც ევრო 2024-ზე კარგი შთაბეჭდილება დატოვა, სანაკრებო პაუზამდე პერსოპოლისში ორი შეხვედრის ჩატარება მოასწრო. ცენტრალურ დაცვაში ადგილს ნაკრების კაპიტანი გურამ კაშია დაიკავებს, რომელიც სანაკრებო პაუზას კარგ განწყობაზე ხვდება - კაშიამ კარიერაში პირველად, სლოვანთან ერთად, ჩემპიონთა ლიგაზე თამაშის უფლება მოიპოვა.
სამწუხაროდ, ლაშა დვალის აპოელისთვის სეზონი წარუმატებლად დაიწყო და ჯერ თამაშიც არ მოუგიათ, თუმცა დვალს სათამაშო პრაქტიკა აქვს, ნაკრებში ყოველთვის სტაბილურობით გამოირჩევა და ევროპის ჩემპიონატზეც დამაჯერებელი იყო. მარცხენა მცველი პოზიციაზე ნაკრებს ირაკლი აზაროვი დაუბრუნდა. ევროპის ჩემპიონატზე არ თამაშის შემდეგ, აზაროვი ორმაგად მოტივირებულია და მზადაა, თავისი შესაძლებლობები დაამტკიცოს.
ნახევარმცველები
რამდენიმე კვირის წინანდელ ინტერვიუში, ლაშა დვალმა გვითხრა, რომ როცა ცენტრში კიტეიშვილი-ქოჩორაშვილის დუეტი მყავს არაფრის მეშინია და ვიცი, ბურთს არ დაკარგავენო. ორივე მათგანს საოცარი საკლუბო სეზონი აქვთ და სანიოლი საყრდენ ზონაში სწორედ ამ დუეტს განიხილავს. კიტეიშვილის ანგარიშზე ამ სეზონში უკვე 2 გოლი და ერთი გოლე გადაცემაა, ქოჩორაშვილის კი გოლი და ასისტი.
მათ წინ გიორგი ჩაკვეტაძე იმოქმედებს. მძიმე კარიერული პერიოდის შემდეგ, ჩაკვეტაძე დაბრუნდა, უოტფორდის ერთ-ერთ მთავარ ლიდერად იქცა და ინგლისში ყველა მის ქებაშია. კიტეს და ქოჩორას მსგავსად, სეზონი ჩაკვემაც გოლით გახსნა.
თავდამსხმელები
ყველაზე დიდი საფიქრალი სანიოლს ამ პოზიციაზე ექნება. მიუხედავად იმისა, რომ ზივზივაძე საოცარ ფორმაშია და ბუნდესლიგა 2-ის ბომბარდირი და კარლსრუეს მთავარი დამრტყმელი ძალაა, ნაკრების ძირითად ფორვარდად მაინც მიქაუტაძე უნდა მოვიაზროთ. ჟორჟი ევრო2024-ის ბომბარდირი გახდა და საქართველოს წარმატებაში უდიდესი წვლილი შეიტანა. გასაგებია, რომ ლიონში მისი კარიერა ისე ვერ დაიწყო, როგორც ველოდით, თუმცა მიქაუტაძე ამ უგოლო სერიის შეწყვეტას სწორედ ნაკრებში შეეცდება.
მიქაუტაძესთან ერთად, მსოფლიოს ერთ-ერთი საუკეთესო ვინგერი ხვიჩა კვარაცხელია მზადაა, რომ ნაპოლიში ჩატარებული წარმატებული მატჩების შემდეგ თავი ეროვნულ ნაკრებშიც გამოიჩინოს. ხვიჩამ სერია ა-ში უვკე მოასწრო გოლის გატანაც, საგოლე გადაცემის გაკეთებაც და მატჩის საუკეთესო ფეხბურთელად დასახელებაც.
საქართველოს ნაკრების სავარაუდო შემადგენლობა LaGazzetta.ge-ს ვერსიით
