საქართველოს ოლიმპიური ნაკრები სამხრეთ ამერიკის კონტინენტზე 40 სპორტსმენით ჩავიდა, რომლებიც 12 სპორტის სახეობაში ასპარეზობდნენ — გახსნის ცერემონიაზე კი მედროშე ძიუდოისტი, ავთანდილ ჭრიკიშვილი იყო.
16 აგვისტოს, ძალოსნობის მძიმე წონის შეჯიბრი გაიმართა, სადაც საქართველოს ნაკრები ორი სპორტსმენით მონაწილეობდა — მოქმედი მსოფლიო და ევროპის ჩემპიონი, ლაშა ტალახაძე და 2015 წლის ევროპის ჩემპიონი, ირაკლი თურმანიძე.
ლაშა ტალახაძემ 215 კგ. აიტაცა, ხოლო აკვრაში 258 კგ. დაძლია და 473 კგ-ით, კარიერაში პირველად გახდა ოლიმპიური ჩემპიონი. ქართველმა ძალოსანმა მეორეადგილოსან გორ მინასიანს 22 კგ-ით აჯობა. მესამე ადგილი კი 448 დაძლეული კილოგრამით ირაკლი თურმანიძემ დაიკავა.
ლონდონში მსაჯების უსამართლო გადაწყვეტილების გამო წაგებული ფინალის შემდეგ, თავისუფალი სტილით მოჭიდავე ლადო ხინჩეგაშვილი რიოში მხოლოდ ოქროს მედლის მოსაგებად იყო ჩასული და 57 კგ. წონითი კატეგორიის მთავარი ფავორიტად მიიჩნეოდა.
ქართველმა მოჭიდავემ ფინალამდე ყაზახი სანაიევი, აზერბაიჯანელი ალიევი და ბულგარელი დუბოვი დამაჯერებლად დაამარცხა. ოქროსთვის ბრძოლაში კი იაპონელ ჰიგუჩის აჯობა და ოლიმპიური ჩემპიონი გახდა.
კვარცხლბეკის უმაღლეს საფეხურამდე 1 ნაბიჯი დააკლდა ვარლამ ლიპარტელიანს — ძიუდოს 90 კგ. წონითი კატეგორიის შეჯიბრი 10 აგვისტოს გაიმართა. ვარლამ ლიპარტელიანმა D ჯგუფში ტაჯიკი უსტოპორიონი, ნაურუელი უერა და მონღოლი ოკტონბაატარი დაამარცხა.
1/2 ფინალში ქართველი ძიუდოისტის მეტოქე მსოფლიო ჩემპიონი, სამხრეთ კორეელი გვაკი იყო, რომელსაც ორი ვაზარით აჯობა და ფინალში გავიდა. ფინალურ ორთაბრძოლაში ვარლამ ლიპარტელიანის მეტოქე იაპონელი მაშუ ბეიკერი იყო — ორთაბრძოლა დაძაბული გამოდგა და საბოლოოდ, იაპონელის გამარჯვებით დასრულდა.
რიოს ოლიმპიური თამაშებზე ბრინჯაოს მედლები ძიუდოისტმა ლაშა შავდათუაშვილმა, ბერძნულ-რომაული სტილით მოჭიდავე შმაგი ბოლქვაძემ და თავისუფალი სტილით მოჭიდავე გენო პეტრიაშვილმა მოიპოვეს. საქართველოს ნაკრები კი 2 ოქროს, 1 ვერცხლის და 4 ბრინჯაოს მედლით გუნდურ ჩათვლაში 38-ე ადგილზე გავიდა.
