უმცროსი ბორჯღალოსნების სამწვრთნელო შტაბმა, სამხრეთ აფრიკაში მიმდინარე 20-წლამდელთა საერთაშორისო სერიის დასკვნითი, მესამე შეხვედრისთვის სათამაშო შემადგენლობა დაასახელა.
30 მაისს, თბილისის დროით 16:30 საათზე, ვიტო კოლელიშვილის შეგირდები მსოფლიოს მოქმედ ჩემპიონს, „ჯუნიორ ბოკეს“ შეერკინებიან. ჩვენი 20-წლამდელები სამხრეთ აფრიკელ თანატოლებს წელს უკვე ორჯერ შეერკინენ. აფრიკელები საქართველოს თებერვალში ეწვივნენ და რუსთავსა და თბილისში ამხანაგური შეხვედრები მოიგეს. საგულისხმოა, რომ ეს გუნდები მეოთხედ ერთმანეთს მსოფლიო რაგბის ახალგაზრდული ჩემპიონატის ფარგლებში, 2 ივლისსაც შეხვდებიან, მანამდე კი საინტერესოა, ვინ როგორი პროგრესი განიცადა თებერვლის მატჩების შემდეგ.
სამხრეთ აფრიკის საერთაშორისო სერიაზე გუნდებმა ორ-ორი გამარჯვება მოიპოვეს. მასპინძლებმა ჩილეს 97:0, ხოლო ფიჯის 82:25 მოუგეს. უმცროსმა ბორჯღალოსნებმა ფიჯის 29:23, ხოლო ჩილეს 59:26 სძლიეს.
სამხრეთ აფრიკაში მესამე თამაშსაც სასტარტოში იწყებენ ბურჯი ლევან ეზიეშვილი და მესამეხაზელები - გუნდის კაპიტანი ლუკა ნარსია და გიორგი ზაზაძე, მგეზავი მათე მახარაძე, ცენტრი ლეონიდე სალდაძე და ფრთა ავთანდილ ზვიადაძე.
ჩილესთან მატჩის შემდეგ ხაზში ორი ცვლილებაა. ფრთაზე ბრუნდება ლუკა ტაბატაძე, ცენტრში კი დათა ახვლედიანი, რომელიც ლეონიდე სალდაძეს, შეუწყვილდება. ღერძზე კვლავ დავით წიკლაურისა და მათე მახარაძის დუეტს ვიხილავთ, მეორე ფრთაზე ზვიადაძეს, ფულბეკად კი ნიკა ხალვაში დადგება.
ოთხი ცვლილებაა შერკინებაში. მარცხენა ბურჯად დამწყებთა შორის დაწინაურდა დაჩი ჭელიძე, რომელიც პირველ ორ თამაშში მარქაფაში იყო. კვაჭად ბრუნდება დავით არჩვაძე, ხოლო მარჯვენა ბურჯი ლევან ეზიეშვილია. მეორე ხაზში თორნიკე ტორაძეს ამჯერად გიორგი მეფარიშვილი შეუწყვილდება, რომელიც ჩილესთან მარქაფაში იყო. მესამე ხაზში ბრუნდება გიორგი არძენაძე, რის გამოც გიორგი ზაზაძემ შემკვრელად გადაინაცვლა. უკვე ვთქვით, რომ სასტარტოში მესამე თამაშს იწყებს კაპიტანი ლუკა ნარსია.
მარქაფიდან გუნდს გააძლიერებენ კვაჭი გიორგი აღნიაშვილი, ბურჯები - აჩი ნოზაძე და გაბრიელ რაზმაძე. მეორე და მესამე ხაზში შეცვლაზე შევლენ პაატა ჩაკვეტაძე და ირაკლი ყოლბაია. ხაზის მარქაფაში არიან თემურ ძოძუაშვილი, დემეტრე დევდარიანი და დათა არობელიძე.
20-წლამდელთა საერთაშორისო სერია
III რაუნდი. 30 მაისი. 16:30
სამხრეთ აფრიკა. ქეიფთაუნი. „სიტი პარკი“
საქართველო - სამხრეთ აფრიკა
საქართველო
ხაზი:15. ნიკა ხალვაში, 14. ავთანდილ ზვიადაძე, 13. დათა ახვლედიანი, 12. ლეონიდე სალდაძე, 11. ლუკა ტაბატაძე, 10. მათე მახარაძე, 9. დავით წიკლაური;
შერკინება:1. დაჩი ჭელიძე, 2. დავით არჩვაძე, 3. ლევან ეზიეშვილი, 4. გიორგი მეფარიშვილი, 5. თორნიკე ტორაძე, 6. გიორგი არძენაძე, 7. ლუკა ნარსია (კაპ.), 8. გიორგი ზაზაძე.
მარქაფა:16. გიორგი აღნიაშვილი, 17. აჩი ნოზაძე, 18. გაბრიელ რაზმაძე, 19. პაატა ჩაკვეტაძე, 20. ირაკლი ყოლბაია; 21. თემურ ძოძუაშვილი, 22. დემეტრე დევდარიანი, 23. დათა არობელიძე.
ფიჯი - ჩილე (18:30)
