La Gazzetta dello Sport Georgia და მოყვარულთა ლიგა თანამშრომლობას იწყებენ. პარტნიორობის ფარგლებში ყოველ ხუთშაბათს მოყვარულთა ლიგის მიმდინარე მოვლენებს, გამორჩეულ მატჩებსა და სატურნირო მდგომარეობას დეტალურად განვიხილავთ.
ჩვენი თანამშრომლობა ჩემპიონატის მიმდინარეობისას შედგა და თბილისის სუპერ ლიგის მე-10 ტურის წინ ვეცდებით, მაქსიმალურად ნათლად ავხსნათ ის პროცესები, რომლებიც ვითარდება.
მოყვარულთა ლიგის მე-11 სეზონი ერთ-ერთი ყველაზე საინტერესო და დაძაბულია ბოლო წლების განმავლობაში. ჩემპიონატი სავსეა მოულოდნელი შედეგებით, კონკურენტული მატჩებითა და ახალი ლიდერებით. გათამაშების ფავორიტები ჯერ კიდევ შორს არიან იდეალური ფორმისგან, რის გამოც სატურნირო ცხრილის ზედა ნაწილში ისეთი გუნდები ვიხილეთ, რომელთა ლიდერობას სეზონის დაწყებამდე ბევრი გულშემატკივარი ვერ ივარაუდებდა. თუმცა ფეხბურთის ხიბლიც სწორედ ამაშია - პროგნოზები ხშირად რეალობას ვერ ემთხვევა.
მოქმედი ჩემპიონი “ბასა“ პარალელურად დავით ყიფიანის სახელობის თასზეც ასპარეზობს და ტურნირის ორი ეტაპი უკვე წარმატებით გადალახა. ორ ფრონტზე ბრძოლამ გარკვეული გავლენა ჩემპიონატზეც მოახდინა. 9 ტურის შემდეგ “ბასას“ მხოლოდ 6 შეხვედრა აქვს ჩატარებული, 8 ქულა დააგროვა და ამ ეტაპზე მე-8 პოზიციას იკავებს. თუმცა გადადებული მატჩების ჩატარების შემდეგ მოქმედ ჩემპიონს ლიდერთა ჯგუფთან ჩამორჩენის შემცირების და ცხრილის სათავეში დაბრუნების რეალური შესაძლებლობა აქვს.
თბილისის სუპერ ლიგაში წელს 12 გუნდი მონაწილეობს. მე-9 ტურის შემდეგ სატურნირო ცხრილს “VS Brothers“ ლიდერობს. სეზონის ერთ-ერთი მთავარი აღმოჩენა სწორედ ეს გუნდია, რომლის შემადგენლობაშიც არაერთი ცნობილი ყოფილი ფეხბურთელი ირიცხება. წარმატებული სტარტის შემდეგ “VS Brothers“ უკვე ჩემპიონობის ერთ-ერთ მთავარ კანდიდატად მოიაზრება. გუნდის ლიდერია ლევან ბოტკოველი, რომელიც 12 გოლით ჩემპიონატის საუკეთესო ბომბარდირია.
სეზონის კიდევ ერთი გამორჩეული გუნდი “ოლ სთარია.“ მათ ხარისხიანი, სანახაობრივი და შედეგიანი ფეხბურთით მოახერხეს კარგი შედეგის დადება და მიმდინარე ჩემპიონატის ერთ-ერთ ყველაზე საინტერესო გუნდად ჩამოყალიბება.
სეზონის გამორჩეულ გუნდებს შორის აუცილებლად უნდა აღინიშნოს “სეუ“, რომელმაც არა მხოლოდ შედეგებით, არამედ თამაშის ხარისხითაც დაგვამახსოვრა თავი. დიდი ანგარიშებით მოპოვებული გამარჯვებები, დომინანტური მატჩები და დამაჯერებელი ფეხბურთი “სეუს“ მიმდინარე ჩემპიონატის ერთ-ერთ ყველაზე საინტერესო გუნდად აქცევს. მათი თამაში ნათლად აჩვენებს, რომ გუნდი მაღალი მიზნებისთვის იბრძვის და ნებისმიერ მეტოქეს სერიოზულ გამოწვევას უქმნის.
მოყვარულთა ლიგის განსაკუთრებულობა მხოლოდ ფეხბურთს თამაშში არ არის. ნამდვილი საფეხბურთო ატმოსფერო ტრიბუნებზეც იგრძნობა, განსაკუთრებით მაშინ, როდესაც “ქომაგები“ თამაშობენ. ბევრი ბრძოლა, ბევრი ემოცია და მუდმივი ხმაური ქმნის იმ გარემოს, რომელიც ფეხბურთს ყველაზე მეტად უხდება. სწორედ ასეთი ემოციები და გულშემატკივრების ჩართულობა ანიჭებს ჩემპიონატს დამატებით ხიბლს და თითოეულ მატჩს ნამდვილ საფეხბურთო დღესასწაულად აქცევს.
თავისი გამორჩეული ხელწერა აქვს “აფხაზეთსაც“. შეკრული, მეგობრული და ერთ დიდ ოჯახად ჩამოყალიბებული გუნდი საკუთარ ღირებულებებს თითოეულ შეხვედრაში ავლენს. მოედანზე შეთამაშება, გუნდური სული და ერთმანეთის მხარდაჭერა აშკარად იგრძნობა, რაც “აფხაზეთს“ ჩემპიონატის ერთ-ერთ ყველაზე სიმპატიურ და გამორჩეულ გუნდად აქცევს.
თუმცა ეს მხოლოდ დასაწყისია. ჩვენი ერთობლივი სერიების ფარგლებში ვეცდებით, მოყვარულთა ლიგის თითოეული გუნდი უფრო ახლოს გაგაცნოთ, მოგიყვეთ მათი ისტორიების, გამორჩეული ფეხბურთელებისა და იმ ემოციების შესახებ, რომლებიც ამ ჩემპიონატს განსაკუთრებულს ხდის.
მანამდე კი ყურადღება მე-10 ტურზე გადავიტანოთ - წინ საინტერესო შაბათ-კვირა გველოდება, სადაც არაერთი პრინციპული და სანახაობრივი დაპირისპირება შედგება. მოყვარულთა ლიგის მე-11 სეზონი სულ უფრო საინტერესო ხდება.
თბილისის სუპერ ლიგა მე-10 ტური:
VS Brothers V All Star
ჯი თი სი V სტელა
შტურმი V ლაზები
სეუ V აფხაზეთი
ქომაგები V ბასა
კვარტალი V კოლხეთი
![[VIDEO] "ლიონელ მესი? შემდეგი კითხვა“ — რონალდუმ არგენტინელზე საუბარი არ ისურვა](/_next/image?url=https%3A%2F%2Fge-gz-uploads-471112570717-eu-central-1-an.s3.eu-central-1.amazonaws.com%2Fuploads%2Fposts%2FFVGgWchi79QbGYQxtAMUBtq2rydxUDz0.png&w=3840&q=75)
