დღეს გაიმართება ევროპის ახალგაზრდული ჩემპიონატის ჯგუფური ეტაპის მეორე ტურის მატჩი საქათველოსა და საფრანგეთის ნაკრებებს შორის.
მიუხედავად იმისა, რომ ფრანგებმა რამდენიმე ლიდერი ტურნირზე არ წაიყვანეს, ისინი მაინც ერთ-ერთ მთავარ ფავორიტებად ითვლებიან და მათი მიზანი ტურნირის ტრიუმფით დასრულებაა.
საქართველოსთან მატჩში ისინი მოედანზე ორმაგი მოტივაციით გამოვლენ, რადგან პირველ ტურში პორტუგალიას ვერ მოუგეს და აუცილებლად გამარჯვება სჭირდებათ.
რაც შეეხება საქართველოს, რამაზ სვანაძის გუნდმა გათამაშება იდეალურად დაიწყო, პროგრამა მინიმუმი შეასრულა და პოლონეთის ნაკრები დაამარცხა.
აღსანიშნავია, რომ ჩვენს ნაკრებში ტრავმიანობა არ არის და ყველა მოთამაშე ამ მნიშვნელოვანი მატჩისთვის მზად არის.
რამაზ სვანაძე (საქართველოს ნაკრების მწვრთნელი): "პოლონეთთან მოგებული მძიმე მატჩის შემდეგ, ძალები აღვიდგინეთ, მცირე დისკომფორტი არის, მაგრამ ფეხბურთელებს სერიოზული ტრავმები არ აქვთ და მზად ვართ საფრანგეთთან სათამაშოდ. საფრანგეთი საკმაოდ კარგად დაბალანსებული გუნდია. რა უნდა დავუპირისპიროთ მათ? - გუნდური თამაში. ყველა ეპიზოდში მაქსიმალური კონცეტრაციაა საჭირო, რადგან ასეთი ნაკრები შეცდომებს არ გპატიობს."
ჟერალდ ბატიკლი (საფრანგეთის ნაკრების მწვრთნელი): "საქართველოს წინა მატჩს ვუყურე და მეტოქე შევისწავლეთ. მათ პოლონეთთან კარგი მატჩი ჩაატარეს და გაიმარჯვეს. ისინი მოტივირებულები არიან და ბრძოლისუნარიანობა აქვთ. წინა მატჩიდან საქართველოს ნაკრების ვერცერთ ფეხბურთელს გამოვყოფ, რადგან გუნდურად კარგად ითამაშეს და წარმატებას ასე მიაღწიეს. ეს მხოლოდ ტურნირის დასაწყისია და ჩვენი მიზანია, რომ მომდევნო მატჩები მოვიგოთ და ჩემპიონატი ტრიუმფით დავასრულოთ"
საფრანგეთი - საქართველო
21-წლამდე ევროპის ჩემპიონატი
14 ივნისი, 23:00
ჟილინას სტადიონი, სლოვაკეთი
მთავარი მსაჯი: იაკობ სიუნდბერგი (დანია)
საქართველოს ნაკრების სავარაუდო შემადგენლობა: ხარატიშვილი, მაისურაძე, საზონოვი, ხვადაგიანი, აზაროვი, ლომინაძე, გაგნიძე, იეგოიანი, გ.მამაგეიშვილი, კვერნაძე, ოდიშარია
