მატჩის დღე - მილანის სტუმრობა იუვენტუსთან და ლონდონური დერბი

დღეს ცენტრალურ მატჩს გვთავაზობს როგორც პრემიერ ლიგა, ისე სერია ა-ც. იტალიაში ტურინის იუვენტუსი მიიღებს მილანს, ინგლისში კი გაიმართება ლონდონური დერბი: არსენალი-ჩელსი. განვიხილოთ, თუ რას უნდა ველოდოთ აღნიშნული შეხვედრებისგან.

არსენალი VS ჩელსი | 19:30

არსენალმა გასულ სეზონში გატეხა 22-წლიანი ნავსი და პრემიერ ლიგის გამარჯვებული გახდა. დედაქალაქელები მთავარ ფავორიტებად ითვლებიან წელსაც, იმის გათვალისწინებით, რომ ლონდონელებს კონკურენტებთან შედარებით ყველაზე შეთამაშებული გუნდი ჰყავთ. სხვა კლუბებში მოხდა გადანაცვლებები, მაგრამ არა "მეთოფეთა" რიგებში.

პრაქტიკულად უცვლელია ემირეიტსის ბინადრების შემადგენლობა, რომელსაც დაემატა ბრუნო გიმარაესი, ეზრი კონსა, ქრისტოს ძოლისი და კიდევ რამდენიმე ახალგაზრდა მოთამაშე. მიკელ არტეტას შეგირდები მიდიან საჩემპიონო გრაფიკით და მათ უკვე მოასწრეს მანჩესტერ სიტის განადგურება სუპერთასზე, ასევე ასტონ ვილასა და ქოვენთრისთან მოგება ჩემპიონატში.

ვახსენეთ გადანაცვლებები და ამ მხრივ პირველ რიგში გამოსარჩევია არსენალის დღევანდელი მეტოქე ჩელსი, რომლის მთავარ მწვრთნელად ჩაბი ალონსო დაინიშნა. მას თავიდან უწინასწარმეტყველებდნენ ლივერპულში მისვლას, მაგრამ ის ლონდონში აღმოჩნდა. ახალ დამრიგებელთან ერთად "არისტოკრატებმა" 2/2 შეხვედრა მოიგეს.

სტემფორდ ბრიჯის ბინადრების ტრანსფერებზე საუბარი წაგვიყვანს ძალიან შორს, ამიტომ, მხოლოდ საკვანძო გარიგებებს შევეხებით. გუნდში მივიდა ემილიანო მარტინესი, რომელმაც კომოში გადასული რობერტ სანჩესი უნდა შეცვალოს. გამოსარჩევია მორგან როჯერსის გაფორმება 138 მილიონ ევროდ...ყველაზე ძვირადღირებული გარიგება ინგლისის ჩემპიონატის ისტორიაში.

ალონსოს გუნდი დატოვეს მარკ კუკურელიამ, ენცო ფერნანდესმა და კიდევ ათობით ფეხბურთელმა. ერთი სიტყვით, დედაქალაქელებში წმენდა ჩატარდა. რაც შეეხება დღევანდელ შეხვედრას, "მეთოფეთა" რიგებში არის საკადრო პრობლემა ვილიამ სალიბას არყოფნის სახით, ჩელსიში კი თითქმის ყველა მოთამაშე მწყობრშია.

ეს იქნება ამ გუნდების რიგით 213-ე მატჩი და რაც შეეხება წინა დაპირისპირებებს, 87-ჯერ იმარჯვეს "კანონირებმა", 64-ჯერ - "არისტოკრატებმა", 61 შეხვედრაც ფრედ დასრულდა. "ლურჯები" ემირეიტსის მკვიდრებთან მოგებას ვერ ახერხებენ უკანასკნელი 11 თამაშის მანძილზე: 8 წაგება და 3 ფრე. ბრიჯის ბინადრებმა ბოლოს 2021-ის აგვისტოში იმარჯვეს.

იუვენტუსი VS მილანი | 22:45

პრემიერ ლიგის მსგავსად, ლიდერების მატჩი სერია ა-შიც გაიმართება. ორივე გუნდმა სეზონი დაიწყო წარმატებით - ორიდან ორი გამარჯვება. იუვენტუსმა მოუგო პარმასა და ფროზინონეს, თანაც გოლის გაშვების გარეშე, მილანმა კი ტორინოსა და ვენეციას. რაც შეეხება ცვლილებებს, ეს პირველ რიგში "როსონერიზე" ითქმის.

მასიმილიანო ალეგრი შეცვალა რუბენ ამორიმმა, ვინც "დიავოლოში" შეეცდება იმ ყველაფრის აშენებას, რისი საშუალებაც მას მანჩესტერ იუნაიტედში არ მიეცა. სან სიროს მკვიდრებმა გაყიდეს რაფაელ ლეაუ, მაგრამ თავისთვის რეკორდულ ფასად, 74 მილიონად გონსალუ რამუში გაიფორმეს.

რაც შეეხება ტურინულ გუნდს, მნიშვნელოვანი გადანაცვლებები არ ყოფილა, ხელმძღვანელობა ლუჩანო სპალეტის ენდობა. დიახ, შემადგენლობა არ შესუსტებულა, მაგრამ ქენან ილდიზის ტრავმამ "ბიანკონერის" საჩემპიონო ამბიციები უახლოესი რამდენიმე თვით მნიშვნელოვნად არია. ახალგაზრდა თურქი ვინგერი ამორიმის შეგირდებთან შეხვედრასაც გამოტოვებს.

ეს იქნება ამ გუნდების რიგით 231-ე მატჩი და რაც შეეხება წინა დაპირისპირებებს, 89-ჯერ იმარჯვა იუვენტუსმა, 66-ჯერ - მილანმა, 75 თამაშიც ფრედ დასრულდა. უკანასკნელი შემთხვევა, როცა იტალიის ჩემპიონატის ფარგლებში ტურინელებსა და "როსონერის" შეხვედრაში გავიდა 2 ბურთზე მეტი, 2021-ის მაისით თარიღდება.

ამის გარდა, "დიავოლომ" "ბიანკონერის" წინააღმდეგ სერია ა-ს ბოლო ექვს მატჩში ერთი გოლის გატანაც კი ვერ მოახერხა. ვნახოთ, შეძლებენ თუ არა სან სიროს მკვიდრები ნავსის გატეხვას ამჯერად, ახალ სპეციალისტსა და ვარსკვლავურ ფორვარდთან ერთად.

კვირის მატჩის დღე