ამ წლების შრომა გადრანს დაუფასდა და საქართველოს ნაკრების მთავარმა მწვრთნელმა, ვილი სანიოლმა სექტემბრის მატჩებისთვის 23-კაციან სიაში შეიყვანა.
გასულ სეზონში, გადრანი აქტობერს რიგებში თამაშობდა, წელს კი კაირათის ფეხბურთელია და ამ სეზონში გოლიც გაიტანა. სანაკრებო პაუზას ის მზადყოფნაში ხვდება.
"ბედნიერი ვარ, რომ ნაკრებში მოვხვდი. ქვეყნიდან უკვე დიდი ხანია წასული ვარ. ის, თუ როგორ გულით ვუდგები ამ სპორტს და როგორ ვშრომობ, დამიფასდა, შეამჩნიეს და გამომიძახეს. ჩემს შესაძლებლობებს მაქსიმალურად გამოვავლენ, რათა ნაკრებს დავეხმარო", - განაცხადა გადრანმა LaGazzetta.ge-სთან საუბარში.
– ნაკრებში გამოძახებას უკვე დიდი ხანია ელოდები, ამის გათვალისწინებით, იყო თუ არა ეს ყველაფერი შენთვის უფრო ემოციური შენთვის?
– სიმართლე გითხრათ, ნაკრებში გამოძახების მოლოდინი ყოველი სანაკრებო პაუზის დროს მაქვს ხოლმე. ველოდები იმიტომ, რომ ამ სპორტს ბევრს ვაძლევ და ბოლომდე ვიხარჯები. როცა ჩემი თავი სიაში ამოვიკითხე, გახარებული ვიყავი. ყველა მილოცავს, ყველას უხარია და მეც ბედნიერი ვარ. სათამაშო პრაქტიკა მაქვს, თავს კარგად ვგრძნობ. ვფიქრობ, ფიზიკურადაც კარგად ვარ.
– რამდენიმე თვის წინ, საქართველოს ნაკრებს ევრო 2024-ზე ეკრანიდან გულშემატკვრობდი, დღეს ამ ნაკრების ნაწილი ხარ...
– ამ ფორმაციის ნაკრებში ისეთი დონის ფეხბურთელები თამაშობენ, მათ გვერდში ყოფნა ჩემთვის ორმაგი სტიმული და მოტივაციაა. გათავისებული გვაქვს, რომ ქვეყნის საქმეს ვემსახურებით და იმედია, ახალ ციკლშიც წარმატებულად ვიასპარეზებთ.
– ახალი ციკლი, ახალი იმედები, როგორია შანსები ჩეხეთთან და ალბანეთთან?
– ნაკრებს უკვე ისე აქვს თამასა აწული, რომ გულშემატკივარი ყველა მატჩში მოგებას ელის. ეს ჩვენც კარგად ვიცით და ყველაფერი უნდა ვქნათ, რომ მათ იმედები არ გავუცრუოთ. როცა ჩამოვალ და შიდა სამზარეულოს ვნახავ, ყველას გავიცნობ და შევხედავ, რა ხდება ნაკრებში, ალბათ, ამ კითხვაზე პასუხი მერე უფრო მექნება.
– ყაზახეთში სავსე ტრიბუნების წინ ბევრჯერ გითამაშია, თუმცა ქართველი ხალხის წინ თამაში სულ სხვა ეფექტია...
– დიახ, ნაკრებში გამოძახება შენი ერისა და ქვეყნის ღირსების დაცვაა. ამდენი ხალხის წინაშე თამაში და ის ემოციები უკვე წარმოდგენილი მაქვს. დიდი აუდიტორიის წინ ბევრჯერ მითამაშია, მაგრამ საქართველოს ნაკრების მაისურით ეს პირველად მოხდება. გულშემატკივარს ვპირდები, რომ თუ თამაშის საშუალება მომეცება, გულით დავიხარჯები და მაქსიმუმს გავიღებ.
