დღეს საქართველოს ეროვნულმა საკალათბურთო ნაკრებმა ისრაელის ნაკრებთან ამხანაგური მატჩი გამართა. დაძაბულ შეხვედრაში ჩვენმა გუნდმა 101:90 გაიმარჯვა.
საქართველოს ნაკრებიდან ყველაზე შედეგიანი გოგა ბითაძე იყო 22 ქულით, სანდრო მამუკელაშვილმა 20, თორნიკე შენგელიამ კი 17 ქულა დააგროვა.
საქართველოს ნაკრები მსოფლიოს ჩემპიონატის მეორე შესარჩევი ჯგუფის მატჩებისთვის ემზადება, 28 აგვისტოს თბილისში მონტენეგროს უმასპინძლებს, 31 აგვისტოს სტუმრად პორტუგალიას ეთამაშება.
შეგახსენებთ, საქართველოს ნაკრებმა მსოფლიოს ჩემპიონატის პირველი შესარჩევი ჯგუფში ესპანეთისა და უკრაინის შემდეგ მესამე ადგილი დაიკავა და მეორე ეტაპზე ასპარეზობის უფლება მოიპოვა. ჯგუფიდან გასული 3 გუნდი გაერთიანდა მომდევნო, D ჯგუფიდან გასულებთან (მონტენეგრო, პორტუგალია, საბერძნეთი) და შეიქმნა ახალი, 6-გუნდიანი ჯგუფი.
პირველ ეტაპზე დაგროვებული ქულები გუნდებს ახალ ჯგუფში გადაჰყვებათ, შესაბამისად, ერთმანეთში ნათამაშები შედეგები უკვე დაფიქსირებულია. მომდევნო 6 თვეში, 3 ფანჯრის ფარგლებში, ნაკრებები ახალ მეტოქეებთან 2-2 მატჩს გამართავენ. საქართველოს მოუწევს საბერძნეთთან, მონტენეგროსთან და პორტუგალიასთან გასვლა-სახლის პრინციპით შეხვედრები.
ფოტო: საქართველოს კალათბურთის ფედერაცია
