თბილისის ოლიმპიურ სასახლეში, გოჯუ-რიუს აკადემიის ორგანიზებით, საქართველოს ჩემპიონატი გაიმართა გოჯუ-რიუ კარატეში.
ჩემპიონატმა ერთ სივრცეში გააერთიანა 270-მდე მონაწილე თბილისიდან და საქართველოს სხვადასხვა რეგიონიდან, მათ შორის აჭარიდან, გურიიდან, სამეგრელოდან და კახეთიდან. სპორტსმენებმა იასპარეზეს ორ ძირითად კატეგორიაში: კატა — ტექნიკური კომპლექსების შესრულება და კუმიტე — ორთაბრძოლები.
შეჯიბრება დილით დაიწყო და მთელი დღის განმავლობაში გულშემატკივრებმა საინტერესო სპორტული სანახაობა იხილეს. ჩემპიონატის ოფიციალურ გახსნის ცერემონიას მოწვეული სტუმრები დაესწრნენ. ცერემონიის ფარგლებში წარმოდგენილი იყო საჩვენებელი გამოსვლა, რამდენიმე ფინალური ორთაბრძოლა და გამარჯვებულთა დაჯილდოების ნაწილი.
ჩემპიონატის შესახებ LaGazzetta.ge-სთან ტურნირის ორგანიზატორებმა და მონაწილეებმა ისაუბრეს:
ლევან როგავა (გოჯუ-რიუს აკადემიის დამფუძნებელი): "საქართველოს ჩემპიონატი გოჯუ-რიუ კარატეში პირველი ჩემპიონატია გოჯუ-რიუს აკადემიის ეგიდით. მონაწილეებს ეტყობათ პროფესიული ზრდა, მაღალი სპორტული ინტერესი გამოვლინდა, რაც იმას ნიშნავს რომ ვითარდებით, ჩვენთვის მნიშვნელოვანია არამხოლოდ საპრიზო ადგილები და გამარჯვებულები, არამედ, ამ ახალგაზრდების ღირსეულ მოქალაქეებად ჩამოყალიბება.
ჩემპიონატმა კიდევ ერთხელ აჩვენა, რომ გოჯუ-რიუ კარატე მხოლოდ საბრძოლო ხელოვნება არ არის — ეს არის გზა, რომელიც ბავშვებსა და ახალგაზრდებს ასწავლის პატივისცემას, მოთმინებას, პასუხისმგებლობას, გამბედაობას და საკუთარ თავზე მუშაობას.
გოჯუ-რიუს აკადემია მადლობას უხდის ყველა მონაწილეს, მწვრთნელს, მსაჯს, მშობელს, მხარდამჭერსა და მოწვეულ სტუმარს, რომლებმაც თავიანთი ჩართულობით მნიშვნელოვანი წვლილი შეიტანეს ჩემპიონატის წარმატებით ჩატარებაში."
ნატუკა ბიძინაშვილი (გოჯუ-რიუს აკადემიის ადმინისტრაციული დიტექტორი): წლებია ჩვენი ფედერაცია ატარებს სხვადასხვა ტურნირს, თუმცა გოჯუ-რიუს აკადემიის ეგიდით ეს პირველი ჩემპიონატია, ძალიან დიდი სულისკვეთება გამოვლინდა. 270 მონაწილე ჩაერთო მთელი ქვეყნიდან. მსგავსი ღონიძიებები მნიშვნელოვანია კულტურული ღირებულების ჩამოყალიბებისა და მეგობრობის გაღვივებისთვის. იმედი მაქვს აქედან იმაზე უკეთესები წავლენ ვიდრე იყვნენ მოსვლამდე.
გოჯუ-რიუს აკადემიისთვის მსგავსი ღონისძიებების მთავარი მიზანი მხოლოდ მედლებისა და სპორტული შედეგების მიღწევა არ არის. განსაკუთრებით მნიშვნელოვანია თითოეული მონაწილის პიროვნული და სპორტული განვითარება — საკუთარი შიშების გადალახვა, თავდაჯერებულობის გაძლიერება, დისციპლინის ჩამოყალიბება, მეგობრული ურთიერთობების შექმნა და ჯანსაღი სპორტული გარემოს განვითარება.
საქართველოს ჩემპიონატი გოჯუ-რიუ კარატეში კიდევ ერთი მნიშვნელოვანი ნაბიჯია ტრადიციული ოკინავური საბრძოლო ხელოვნების განვითარებისა და პოპულარიზაციის გზაზე საქართველოში.
ზუკა ჩარგაზია (საქართველო ჩემპიონატის გამარჯვებული): "დაახლოებით 10 წელია რაც გოჯუ-რიუ კარატზე დავდივარ. დიდი ხანია ვემზადებით ამ ტურნირისთვის, უდიდესი შრომა ჩავდეთ, ყველა ტურნირის შემდეგ უფრო ძლიერები ვხვდებით, ვიდრე ვიყავით. სასიამოვნოა გამარჯვება და წარმატებას ვუსურვებ ყველას.
დემეტრე გიგაშვილი (საქართველოს ვიცე-ჩემპიონი): გოჯუ-რიუ კარატეს ჩემპიონატზე კარგად გამოვედი დღეს. 7 წლის ვარ, ერთი წელია რაც გოჯუ-რიუ აკადემაიში დავდივარ, ყვითელი ქამრის მფლობელი ვარ. მეორე ადგილზე გავედი და მიხარია, რომ შევძელი მედლის მოპოვება.
