დღეს, საფრანგეთის ნაკრები 2026 წლის მსოფლიო ჩემპიონატზე პირველ მატჩს გამართავს. მეტოქე არის სენეგალის ეროვნული გუნდი, რომელთანაც "მამლებმა" იაპონია / სამხრეთ კორეის მუნდიალზე გახსნითი შეხვედრა წააგეს. აღნიშნული შედეგი ითვლება ერთ-ერთ ყველაზე დიდ სენსაციად ფეხბურთის ისტორიაში.
"ლურჯები" იმ დროს იყვნენ მსოფლიოსა და ევროპის მოქმედი ჩემპიონები, ფავორიტებად, 2002 წლის ტურნირზეც ითვლებოდნენ. "ტერანგას ლომებთან" წაგებასა და საფრანგეთის ეროვნული გუნდის ზოგად კრახზე ისაუბრა ტიერი ანრიმ, რომელიც იმდროინდელი გუნდის ერთ-ერთი მთავარი ვარსკვლავი იყო.
"ის, რაც მოხდა 2002 წლის მსოფლიო ჩემპიონატზე იყო უდიდესი შოკი, რადგან საფრანგეთს საუკეთესო ნაკრები ჰყავდა. სამწუხაროდ, ოპტიმალურ ფორმაში არ ვყოფილვართ. მუნდიალის დაწყებამდე ტრავმა მიიღო ზიდანმა, დაზიანება მქონდა მეც. დიახ, ის შედეგი შემთხვევითობა ნამდვილად არ ყოფილა.
საკლუბო სეზონში 70 ჩატარებული მატჩის შემდეგ, შენ არ გაქვს დასვენებისა და სათანადო მომზადების დრო, თუმცა ხალხი მაინც ითხოვს შენგან საუკეთესო შედეგს, რადგან საქმე მუნდიალს ეხება. არავის სურს იმის გაგონება, თუ რამ გამოიწვია წარუმატებლობა", - განაცხადა ფრანგმა ექს-ფორვარდმა.
