ერთა ლიგა: ჯგუფური ეტაპის გადამწყვეტი მატჩები

მოგვიახლოვდა ერთა ლიგის ჯგუფური ეტაპის, ბოლო მეექვსე ტური, რომელიც არაერთ საინტერესო დაპირისპირებას გვიმზადებს. განვიხილოთ დღევანდელი მატჩის დღე.

იტალია V საფრანგეთი

ევროპული ფეხბურთის მორიგი კლასიკა. შეგახსენებთ, რომ ამ ნაკრებების პირველი შეხვედრა დასრულდა იტალიის დამაჯერებელი გამარჯვებით, ანგარიშით 3:1. ჯგუფის ლიდერიც 13 ქულით არის "სკუადრა აძურა", რომელიც უახლოეს მდევრებს, სწორედ "მამლებს" 3 ქულით უსწრებს. შემდეგ მოდიან ბელგია და ისრაელი, რომლებიც ჯგუფის ლიდერებს ვეღარ დაეწევიან.

"გალიელებს" პირველი ადგილის დასაკავებლად აქვთ მხოლოდ ერთი გზა - გამარჯვება. ამ შემთხვევაში იქნება ქულათა თანაფარდობა და გადამწყვეტი ამ შემთხვევაში ურთიერთმატჩებში დაფიქსირებული შედეგი გახდება. როგორც აღვნიშნეთ, პირველ მატჩში აპენინელებმა 3:1 მოიგეს. ფავორიტებად მოიაზრებიან "ლურჯები", რომლებმაც ჩაგდებული ევრო 2024-ის შემდეგ, ახალი ციკლი წარმატებით დაიწყეს.

"სამფეროვნების" გარშემო კი ბევრი გაურკვევლობაა - ნაკრებში მიმდინარეობს თაობა ცვლის პროცესი, წავიდნენ ოლივიე ჟირუ და ანტუან გრიზმანი, ფსიქოლოგიურ პრობლემებს ებრძვის კილიან მბაპე, დიდიე დეშამს კი ბევრის აზრით, შემცვლელი სჭირდება. საფრანგეთმა ყველა ეს პრობლემა მუნდიალის მოახლოებამდე უნდა მოაგვაროს.

რაც შეეხება დღევანდელ შეხვედრას, "მამლებს" საკადრო პრობლემები ზემოაღნიშნული ტრიოს გარეშეც არ აკლია. თამაშს ტრავმის გამო გამოტოვებენ ოსმან დემბელე, ორელიან ჩუამენი, იუსუფ ფოფანა და ლოიკ ბადე. "გალიელებს" ყვითელი ბარათების გამო ედუარდო კამავინგაც დააკლდება. ლუჩიანი სპალეტის განკარგულებაში კი დღეს რიკი კალაფიორი და სამუელე რიკი არ იქნებიან.

ინგლისი V ირლანდია

უდიდეს ინტერესს იწვევს ინგლისისა და ირლანდიის ნაკრებების დაპირისპირებაც. მასპინძლებს ჯერ კიდევ არ გაუნაღდებიათ პირველი ადგილი - მათსა და საბერძნეთის ეროვნულ გუნდს შორის არის ქულათა თანაფარდობა, 12:12. "კელტებს" აქვთ 6 ქულა, რითაც ისინი ვერ ეწევიან ჯგუფის ლიდერებს, მაგრამ აუტსაიდერი ფინეთისთვისაც მიუწვდომელები არიან.

ეს ნიშნავს იმას, რომ "მწვანეები" C დივიზიონში დაქვეითების პლეიოფს ითამაშებენ. იქამდე, მათ ელით შეხვედრა უპრინციპულეს მოწინააღმდეგესთან. შეგახსენებთ, რომ ამ გუნდების პირველ მატჩში მოიგეს ბრიტანელებმა, თანაც გოლები გაიტანეს "სამყურების" ეთნიკურმა წარმომადგენლებმა: ჯეკ გრილიშმა და დეკლან რაისმა.

არ უნდა დაგვავიწყდეს ის ფაქტიც, რომ ალბიონელების ამჟამინდელი მწვრთნელი, ლი კარსლი ასევე ირლანდიელია. 2025 წლიდან, მას ჩაანაცვლებს ტომას ტუხელი, თავად ინგლისის ეროვნული გუნდის დამრიგებელი კი დიდი ალბათობით ახალგაზრდულებში დაბრუნდება.