რამდენიმე დღის წინ, ამ გუნდებმა ერთმანეთში ერთგვარი რეპეტიცია გაიარეს და საქართველოს სუპერთასი გაითამაშეს, ახლა კი ევრო ასპარეზზე საქართველოს სახელს წარადგენენ.
უკვე ბევრჯერ აღვნიშნეთ, რომ დინამო თბილისი ამ ევროტურნირებს საკმაოდ ახალგაზრდული შემადგენლობით ხვდება. გამოცდილი ფეხბურთელი თორნიკე ოქრიაშვილი მატჩის განაცხადში არ არის.
დინამოელთა მეტოქე მონტენეგროს წარმომადგენელი მორნარ ბარია, რომელმაც გასულ სეზონში მეორე ადგილი დაიკავა. შეხვედრა თბილისის დროით 22:34 საათზე დაიწყება.
რაც შეეხება ტორპედოს, ქუთაისელები ალბანურ ტირანას ჩვენი დროით 21:00 საათზე უმასპინძლებენ. გუნდის მთავარი მწვრთნელი სტივ კინი ამბობს, რომ ტორპედო ამ მატჩს მომზადებული ხვდება და მათი მიზანი გამარჯვებაა.
რა თქმა უნდა, ქუთაისში შენგელია არენაზე გადაჭედილ ტრიბუნებს უნდა ველოდოთ, რაც ფეხბურთელებს ორმაგ მოტივაციას მისცემს.
ამ მატჩს გუნდის ლიდერი გიორგი არაბიძე გამოტოვებს, რომელიც გუნდს მალე დატოვებს და სამხრეთ კორეაში გააგრძელებს კარიერას.
