დარასელიას თასის გათამაშებაში 6 გუნდი ჩაერთვება: დინამო თბილისი, თბილისის ლოკომოტივი, იუვენტუსი (იტალია), უოტფორდი (ინგლისი), ვალენსია (ესპანეთი) და გალათასარაი (თურქეთი).
გუნდები A და B ჯგუფში გადანაწილდებიან, პირველ ადგილოსნები ავტომატურად ნახევარფინალური ეტაპის საგზურს მოიპოვებენ, მეორე და მესამე ადგილზე გასული გუნდები ჯვარედინული პრინციპით (A2-B3; B2-A) ერთმანეთს მეოთხედფინალში დაუპირისპირდებიან. მეოთხედფინალის გამარჯვებულები ბრძოლას თასისთვის განაგრძობენ, დამარცხებულები კი ერთმანეთს მე-5 ადგილისთვის მატჩში შეხვდებიან. ჩატარდება მე-3 ადგილისთვის შეხვედრაც.
ჯგუფური ეტაპის 23, 24 და 25 აგვისტოს გაიმართება, 26 აგვისტოს მეოთხედფინალებია დაგეგმილი, 27-ში - ნახევარფინალი, 28 აგვისტოს კი, დარასელიას თასის ფინალური დღეა.
მიმდინარე წელს, არსებობის განმავლობაში პირველად, ტურნირი სრულად ბუნებრივ საფარიან მოედნებზე გაიმართება: დარასელიას თასი 2024-ის მატჩებს ილია კოკაიას სახელობის საფეხბურთო ცენტრი და საგურამოში ს.კ ლოკომოტივის საფეხბურთო ბაზა უმასპინძლებს, ტურნირის ფინალური შეხვედრა დინამო არენაზეა დაგეგმილი.
სიახლეა ისიც, რომ ტურნირს ორი ელჩი ეყოლება. ქართული ფეხბურთის გამორჩეული წარმომადგენლები: თემურ ქეცბაია და ვლადიმერ გუცაევი ტურნირის განვითარებისა და პოპულარიზაციისთვის, მონაწილეობას სხვადასხვა სახის აქტივობაში მიიღებენ.
დარასელიას თასი 2024-ის ყველა შეხვედრის პირდაპირ რეპორტაჟს საქართველოს პირველი არხი შემოგვთავაზებს. ქართული გუნდების მონაწილეობით გამართული მატჩები პირველი არხის ეთერში გადაიცემა, ხოლო უცხოური გუნდების დაპირისპირება - პირველი არხი სპორტზე.
აღსანიშნავია, რომ ზარაფხანასა და Sports Orient-ის თანამშრომლობით შეიქმნა მედალი, რომელიც ლეგენდარული ვიტალი დარასელიას სახელს ატარებს. აღნიშნულ ჯილდოს დარასელია თასი 2024-ის საუკეთესო ფეხბურთელი მიიღებს.
შენიშვნა: მასალაში გამოყენებულია Sports Orient-ის ფოტოები
