ჩემპიონთა ლიგის ფინალში შედგება ესპანური დერბი მთავარ მწვრთნელებს შორის - ლუის ენრიკე მიკელ არტეტას წინააღმდეგ. ეს იქნება მეხუთე შემთხვევა, როცა ევროპის მთავარი საკლუბო ტურნირის ფინალში ერთმანეთის პირისპირ ერთი ქვეყნის წარმომადგენელი სპეციალისტები აღმოჩნდებიან.
პირველად ეს მოხდა ჩემპიონთა თასის 1978/1979 წლების ფინალში, როდესაც ნოტინგემ ფორესტმა მინიმალური ანგარიშით მალმიო დაამარცხა. როგორც "მეტყევეებს", ისე "ლურჯებს" ჰყავდათ ინგლისელი დამრიგებლები: ბრაიან კლაფი და ბობ ჰოუტონი. ჩემპიონთა თასის ერაში ეს იყო პირველი და უკანასკნელი მსგავსი დუელი.
რაც შეეხება ჩემპიონთა ლიგას, ისტორია გაგრძელდა მარჩელო ლიპისა და კარლო ანჩელოტის დაპირისპირებით, ტურინის იუვენტუსისა და მილანის დუელში. ეს მოხდა 2002/03-ის სეზონში და 10 წლის შემდეგ, ევროპის მთავარი საკლუბო ტურნირის ფინალში შედგა უკვე გერმანული დერბი: იუპ ჰაინკესი იურგენ კლოპის წინააღმდეგ.
იმ მატჩში მიუნხენის ბაიერნმა დორტმუნდის ბორუსია დაამარცხა. ბოლოს კი 2019/2020 წლების სეზონის ფინალი, სადაც "რეკორდმაისტერმა" დაამარცხა პარის სენ-ჟერმენი, ჰანსი ფლიკმა კი ტომას ტუხელი. წელს, როგორც აღვნიშნეთ, ევროპის მთავარ საკლუბო ტურნირზე ესპანური დერბი შედგება.
ჩემპიონთა ლიგის ფინალები, რომელშიც მწვრთნელები ერთი ქვეყნიდან იყვნენ
| ბრაიან კლაფი V ბობ ჰოუტონი | ინგლისი | ნოტინგემი 1:0 მალმიო | 1978/79 |
| კარლო ანჩელოტი V მარჩელო ლიპი | იტალია | მილანი 0:0 (პენ. 3:2) იუვენტუსი | 2002/03 |
| იუპ ჰაინკესი V იურგენ კლოპი | გერმანია | ბაიერნი 2:1 დორტმუნდი | 2012/13 |
| ჰანსი ფლიკი V ტომას ტუხელი | გერმანია | ბაიერნი 1:0 პსჟ | 2019/20 |
| ლუის ენრიკე V მიკელ არტეტა | ესპანეთი | პსჟ ?:? არსენალი | 2025/26 |
