დღეს ბორჯღალოსნებმა შევარდენის სანაკრებო ბაზაზე წლის პირველი შეკრება დაიწყეს. პიერ-ანრი ბრონკანისა და მარკო ბორტოლამის გუნდი 2026 წლის რაგბი ევროპის ჩემპიონატისთვის ემზადება.
ზაფხულამდე გუნდს ბორტოლამი (ბრონკანთან კოორდინაციით) გაუძღვება და სადებიუტო თამაშს მისი გაწვრთნილი გუნდი 8 თებერვალს შვეიცარიაში, ივერდონ ლე ბენში, მასპინძელთა წინააღმდეგ გამართავს. შეხვედრა საქართველოს დროით 16 საათზე დაიწყება.
34-კაციან გაფართოებულ შემადგენლობაში ერთი იძულებითი ცვლილებაა. ტრავმირებული მესამეხაზელის, ილია სპანდერაშვილის ნაცვლად გუნდს ‘შავი ლომიდან’ გიორგი ცუცქირიძე დაემატა, რომლის ანგარიშზე 42 სანაკრებო კეპი და 6 ლელოა.
შეგახსენებთ, შარშან რაგბი ევროპის ჩემპიონატის დებიუტანტ შვეიცარიას თბილისში, „ავჭალაზე“ ვუმასპინძლეთ და ჩვენი ნაკრების ისტორიაში სარეკორდო სხვაობით, 110:0 დავამარცხეთ.
საქართველო შვეიცარიას მესამედ ეთამაშება. დამოუკიდებელი ქართული რაგბის გარიჟრაჟზე, 32 წლის წინ, 1994 წლის 4 ივნისს, ჩვენმა გუნდმა მე-13 თამაში შონ დე ფონში გამართა და მეტოქე მინიმალური სხვაობით, 22:21 დაამარცხა. მას შემდეგ ქართულმა რაგბმა უდიდესი პროგრესი განიცადა, რაც ამ გუნდების მეორე შეხვედრაში აისახა და 2025 წლის 1 თებერვალს მეტოქეს 16 უპასუხო ლელო გავუტანეთ - 110:0.
შვეიცარიაში პირველი სარაგბო მატჩი ჯერ კიდევ მე-19 საუკუნეში, 157 წლის წინ გაიმართა. ლოზანას სარაგბო კლუბმა თავისი პირველი თამაში 1869 წელს ჩაატარა, თუმცა რაგბმა შვეიცარიაში პოპულარობა ვერ მოიპოვა და რაგბის ფედერაციაც საუკუნის შემდეგღა დააარსა.
შვეიცარიის რაგბის ფედერაცია 1972 წელს დაარსდა, თუმცა თავდაპირველად რაგბი უსისტემოდ ვითარდებოდა. შვეიცარიის ნაკრები 1973 წელს ჩამოყალიბდა და პირველი თამაში 11 აპრილს, პორტუგალიის წინააღმდეგ გამართა (4:23). გუნდმა პირველი გამარჯვება 1975 წელს იზეიმა, როდესაც სერბეთისა და მონტენეგროს ნაკრებს 12:3 სძლია.
გუნდის თიკუნი “ედელვაისია” და ეს თეთრი ყვავილი შვეიცარიის რაგბის კავშირის გერბზეა წარმოდგენილი. შვეიცარიის რაგბის კავშირი 1974 წელს რაგბი ევროპის, ხოლო 1988 წელს მსოფლიო რაგბის წევრი გახდა.
ყველაზე დიდი სხვაობით შვეიცარიის ნაკრები 2025 წელს საქართველოსთან დამარცხდა (0:110), თავად კი 2000 წელს ბულგარეთი დაამარცხეს 90:9.
2000 წელს „ედელვაისი“ რაგბი ევროპის გათამაშების მესამე დივიზიონში ჩაერთო, 2016 წლიდან დღემდე კი რეგულარულად თამაშობდა მეორე დივიზიონში, ალაფაზე. 2024 წელს შვეიცარიამ ალაფაზე პირველი ადგილი დაიკავა და ისტორიაში პირველად, ჩემპიონატზე აღზევდა, სადაც მათ პირველი ოთხი მატჩი დათმეს, ბოლოს კი გერმანიას 20:17 სძლიეს და მე-7 ადგილი დაიკავეს.
შვეიცარიას არასდროს უთამაშია მსოფლიო თასზე, რეიტინგში კი 55,26 ქულით 28-ე ადგილზეა. რეიტინგში მას საუკეთესო შედეგი 2023 წელს ჰქონდა (26-ე ადგილი), ხოლო ყველაზე დაბალ პოზიციას 2010 წელს იკავებდა (67).
მოცემული მომენტისთვის შვეიცარიაში 50 სარაგბო კლუბი და 6 ათასამდე რეგისტრირებული მოთამაშეა. აღსანიშნავია, რომ 2006/07 წლების სეზონში, ფრანგულმა ‘ბურგუენმა’ იმხანად ჰეინეკენის თასის (ამჟამად ჩემპიონთა თასი) მატჩი ჟენევაში გამართა, ირლანდიურ ‘მანსთერს’ უმასპინძლა და თამაშს 16 255 მაყურებელი დაესწრო.
ბორჯღალოსნების გაფართოებული შემადგენლობა 2026 წლის რაგბი ევროპის ჩემპიონატისთვის:
პირველი ხაზი:გიორგი ახალაძე (კლერმონი), ლუკა გოგინავა (მონ დე მარსანი), მამუკა მსტოიანი (აჟენი); ვანო კარკაძე (ოიონა), ნიკოლოზ სუთიძე (ლა როშელი), ლუკა ნიორაძე (ორიაკი); ირაკლი აფციაური (ლიონი), ალექსანდრე ქუნთელია (ლა როშელი), გიორგი მელიქიძე (სტად ფრანსე);
მეორე ხაზი:მიხეილ ბაბუნაშვილი (შავი ლომი), თემურ წულუკიძე (ოიონა), დავით ლაგვილავა (პერპინიანი), გიორგი ჯავახია (ტულონი), გაგი მარგველაშვილი (რასინგი);
მესამე ხაზი:ლუკა ივანიშვილი (ბრისტოლი), გიორგი ცუცქირიძე (შავი ლომი), ბექა საღინაძე (ლიონი), ანდრო დვალი (პერპინიანი), თორნიკე ჯალაღონია (პროვანსი), იოანე იაშაღაშვილი (მონ დე მარსანი);
ღერძი:ვასილ ლობჟანიძე (ოიონა), გელა აფრასიძე (პერპინიანი), გიორგი სპანდერაშვილი (შავი ლომი); ლუკა მატკავა (ოიონა), თედო აბჟანდაძე (ორიაკი);
ცენტრი:გიორგი კვესელაძე (გრენობლი), გიორგი შველიძე (ბრივი), თორნიკე კახოიძე (შავი ლომი), დემურ თაფლაძე (შავი ლომი), დავით ბარბაქაძე (ლიონი);
ფრთა:ნიკოლოზ რეხვიაშვილი (ყოჩები), აკაკი ტაბუცაძე (შავი ლომი);
ფულბეკი:დაჩი პაპუნაშვილი (ორიაკი), ოთარ მეტრეველი (შავი ლომი).
