ბათუმი 8-12 წლამდე მოჭადრაკეებს შორის მსოფლიო თასს უმასპინძლებს. ტურნირი 22 ივნისიდან 3 ივლისის ჩათვლით გაიმართება და მასში 40-მდე ქვეყნის 300-მდე მოჭადრაკე მიიღებს მონაწილეობას. ასპარეზობა 6 ტურნირად ჩატარდება. შეჯიბრება სხვადასხვა ასაკობრივ კატეგორიაში (U8, U10, U12) გოგოებსა და ბიჭებს იმართება. მსოფლიო თასი ერთ-ერთი უმნიშვნელოვანესი ახალგაზრდული ტურნირია. შეჯიბრებაში მონაწილეობისთვის, სხვადასხვა ეტაპის გავლაა საჭირო. აღნიშნულ ტურნირამდე, ქართველმა მოჭადრაკეებმა ევროპის სასკოლო ჩემპიონატზე წარმატებით იასპარეზეს. შეჯიბრება ახალგაზრდა მოჭადრაკეებისთვის მსოფლიო თასის წინ, ერთგვარი მოსამზადებელი ეტაპი იყო.
მსოფლიო თასის ქართველი მონაწილეები ახალ შესაძლებლობებზე საუბრობენ და აღნიშნავენ, რომ შეჯიბრებამდე ბევრი იშრომეს და ყველაფერს გააკეთებენ სასურველი შედეგი დასაფიქსირებლად:
ალექსანდრე ცხოვრებაძე: "8 წლის ვარ და ტურნირის ერთ-ერთი ყველაზე პატარა მონაწილე ვარ., ჩემთვის ეს პირველი მსოფლიო თასია. ვასპარეზობ 8 წლამდე ასაკის ჭაბუკებში. მიხარია, რომ ჩემი წვლილი შევიტანე „სსიპ ანდრია რაზმაძის სახელობის ქუთაისის 41-ე ფიზიკა-მათემატიკის სკოლის“ გამარჯვებაში სასკოლო საჭადრაკო ოლიმპიადა - „ნონა გაფრინდაშვილის თასზე“. ამ შემთხვევაშიც ვეცდები ჩემი შესაძლებლობების მაქსიმუმი გამოვავლინო."
ნატალინა ედიბერიძე: „მე 7 წლის ვარ. ა,მ ტურნირზე მე და ჩემი და ვმონაწილეობთ. როცა ჩემს დას ვუყურებდი ჭადრაკის თამაშის დროს, მეც მომინდა და ვისწავლე ფიგურების სვლები, მერე უკვე ტურნირებშიც დავიწყე მონაწილეობა და ძალიან მომწონს. პირველად ვთამაშობ მსოფლიო თასზე. ცოტას ვნერვიულობ, მაგრამ მაინც მიხარია რომ აქ ვარ ასეთ ძლიერ ტურნირზე. თან ვიცი რომ უამრავ მეგობარს შევიძენ. თან გავერთობი, თან ჭადრაკს ვითამაშებ და როცა მოვიგებ ძალიან გამიხარდება.“
ალექსანდრა ედიბერიძე: „მე 10 წლის ვარ და აქამდე ბევრ ტურნირზე მიმიღია მონაწილეობა, მათ შორის, მსოფლიო ჩემპიონატებზე. მსოფლიო თასზე მეორედ ვარ, ურთულესი ტურნირია. უძლიერესი ბავშვები ასპარეზობენ მთელი მსოფლიოდან. დღესაც პირველივე დღეს ურთულესი ბრძოლით ვიწყებ, ძლიერი მოწინააღმდეგე მეყოლება.“
