7 ივნისის შემდეგ, La Gazzetta.ge-ს გუნდი საქართველოს ნაკრებთან ერთად ვართ, ჯერ მონტენეგროში, შემდეგ კი გერმანიაში და ყოველდღიურად ვაშუქებთ ნაკრებში მიმდინარე ამბებს.
საშუალება გვქონდა დავსწრებოდით მათ ყველა ვარჯიშს და შემოგვეთავაზებინა ინტერვიუები საქართველოს ნაკრების ფეხბურთელებთან.
ეს შესავალი იმისთვის დაგვჭირდა, რომ რაც დღეს საქართველოს ნაკრების ვარჯიშზე ვიხილეთ, ჩვენი აქ ყოფნის პერიოდში აქამდე არასდროს მომხდარა. ჟურნალისტებისთვის გამოყოფილი ადგილი უამრავი ადამიანითა და სხავდასხვა ქვეყნის მედიით იყო სავსე, თან საკმაოდ გავლენიანი გამოცემები იყვნენ მოსულები. ასეთი მოთხოვნადი ჩვენი ნაკრები აქამდე ჯერ არ ყოფილა.
წამყვანმა გამოცემებმა ჩვენთან ერთად ჩაწერეს გიორგი მამარდაშვილი, ლუკა ლოჩოშვილი და ოთარ კიტეიშვილი. განსაკუთრებით დიდი ყურადღება მამარდაშვილისკენ იყო მიმართული, რომელმაც ბრწყინვალე მატჩები ჩაატარა. მამარდამ დასამახსოვრებელი კომენტარი გააკეთა ხვიჩა კვარაცხელიაზე, აღნიშნნა, რომ კვარა ესპანეთის ნაკრების ყველა ფეხბურთელს ჯობია.
ვარჯიშის წინ და ვარჯიშის შემდეგ, ესპანელი ჟურნალისტები დიდი ხანი ელოდებოდნენ გიორგი ქოჩორაშვილს, რათა მასთან სხვადასხვა საკითხზე ესაუბრათ, თუმცა, ჟურნალისტებისთვის სამწუხაროდ, ის არ გამოსულა ინტერვიუსთვის.
რაც შეეხება უშუალოდ ვარჯიშს, დღევანდელი ვარჯიში შედარებით განსხვავებული და აღდგენითი სახის იყო. იმ ფეხბურთელებმა, რომლებმაც პორტუგალიასთან 90 წუთი ითამაშეს, დღეს მხოლოდ ირბინეს და ფიზიკურად მსუბუქად ივარჯიშეს. დანარჩენმა ფეხბურთელებმა ჩვეულებრივ, ბურთთან ერთად განაგრძეს ვარჯიში. გიორგი გველესიანმა ინდივიდუალურად, დარბაზში ივარჯიშა.
ყველა ფეხბურთელი კარგ ხასიათზეა. ჩეხეთთან გაცუდებული მომენტის შემდეგ, ხასიათი საბა ლობჟანიძესაც გამოუკეთდა. ჯგუფიდან გასვლამ ის უსიამოვნო მომენტი მასაც დაავიწყდა და ხალხსაც. საბა ყველას უყვარს, ნაკრებში კარგი განწყობაა, რაც ვარჯიშეზეც იგრძნობა, ასეთი მიდგომა უშუალოდ თამაშებზეც გადადის და შედეგი სახეზეა.
მატჩამდე ერთი დღით ადრე, საქართველოს ნაკრები დასკვნით ვარჯიშს სრული დატვირთვით ჩაატარებს. გაიმართება მატჩისწინა პრესკონფერენციაც, რომელსაც სრულად შემოთავაზებთ.
