დღეს, არგენტინის ნაკრები მსოფლიო ჩემპიონატის ჯგუფური ეტაპის მეორე ტურის ფარგლებში ავსტრიის ეროვნულ გუნდს დაუპირისპირდება. "არწივები" "ალბისელესტესთვის" განსაკუთრებული ოპონენტია, რადგან სწორედ აღნიშნული ქვეყნის ეროვნული გუნდის წინააღმდეგ შეასრულა დიეგო მარადონამ თავისი პირველი და ერთადერთი ჰეთ-თრიქი საერთაშორისო ასპარეზზე.
ეს მოხდა 1980 წლის 21 მაისს, ამხანაგურ მატჩში, სადაც "სელესიონმა" "ვუნდერთიმი" ანგარიშით 5:1 გაანადგურა. სამი გოლის გარდა, არგენტინელმა ფლეიმეიქერმა სანტიაგო სანტამარიაზე ასისტიც გაიფორმა. ჰეთ-თრიქი ლიონელ სკალონის შეგირდების გარშემო უკანასკნელ პერიოდში აქტუალური თემაა, მას შემდეგ, რაც ლიონელ მესიმ ალჟირს 3 ბურთი შეუგდო.
არგენტინელ შემტევს მსოფლიო ჩემპიონატებზე დაუგროვდა 16 გოლი, რითაც ის მიროსლავ კლოზეს გაუთანაბრდა. დღეს, მორიგი გოლის გატანის შემთხვევაში, ინტერ მაიამის ამჟამინდელი კაპიტანი გახდება ყველა დროის საუკეთესო გოლეადორი მუნდიალების ისტორიაში. ეს ყველაფერი კი იმ ოპონენტის წინააღმდეგ, რომელთანაც 46 წლის წინ, არგენტინის ეროვნული გუნდის ლეგენდარულმა ფლეიმეიქერმა გაიბრწყინა.
