LaGazzetta.ge-ს ინფორმაციით, იბერიაში ჩატარებული წარმატებული სეზონის შემდეგ, სანდრო ალთუნაშვილი კარიერას ისრაელის ჩემპიონატში, ჰაპოელ ჰაიფაში გააგრძელებს.
მოგეხსენებათ, ალთუნაშვილმა იბერიაში სეზონის მეორე ნახევარი ჩაატარა და გუნდთან ერთად საქართველოს ჩემპიონი გახდა.
"დიდი მადლობა მინდა გადავუხადო იბერიას ხელმძღვანელებს, მწვრთნელებს, ფეხბურთელებს გვერდში დგომისთვის. მიზანს ერთად მივაღწიეთ და ჩემპიონები გავხდით. ამის დამსახურებაა, რომ შემოთავაზება ისრაელიდან მივიღე. ვფიქრობ, ამ ჩემპიონატში გადასვლა ჩემთვის წინგადადგმული ნაბიჯი იქნება, ეს ახალი გამოწვევაა, რადგან ჰაპოელი ისტორიული და ერთ-ერთი გამორჩეული კლუბია ისრაელში.
შემოთავაზება იბერიადანაც მქონდა, თუმცა უფრო ძლიერ ლიგაში გადასვლა მინდოდა და როცა ჰაპოელიდან შემოთავაზება მივიღე, მოცდა აღარ მსურდა.
ისე გამოვიდა, რომ ამ დროის განმავლობაში, მე იბერიას დავეხმარე, იბერია კი მე დამეხმარა. იბერია სტაბილურ გუნდად ჩამოყალიბდა და ამის ხარჯზე, შესწევთ ძალა, რომ ევროტურნირებზე კარგად გამოვიდნენ. წარმატებებს ვუსურვებ მათ.
არ ვიცი რა არის ამის მიზეზი, მაგრამ მაშინდელ ეროვნულ ლიგას, როცა აქ წლები ვთამაშობდი და ახლანდელ ეროვნულ ლიგას შორის, დონეში სხვაობაა, ვფიქრობ, მაშინ უფრო მაღალი დონე იყო", - განაცხადა ალთუნაშვილმა ჩვენთან საუბარში.
როგორც ჩვენთვის არის ცნობილი, ალთუნაშვილი ახალ გუნდთან 1.5 წლიან კონტრაქტს გააფორმებს.
