თუ საუბარს ქართული ფეხბურთის გამორჩეულ ტალანტებზე დავიწყებთ, პირველ რიგში 16 წლის ანდრია ბართიშვილი უნდა გაგვახსენდეს. საოცარი მონაცემებით და თამაშის სტილით, ბართიშვილი უკვე რამდენიმე წელია თავისი თაობის მოწინავე მოთამაშეა, თუმცა თავისი შესაძლებლობების ყველაზე კარგად გამოვლენის საშუალება მას წელს მიეცა.
ჩაკვეს, კვარას, ზურიკოს და სხვების შემდეგ, შეიძლება თამამად ვთქვათ, რომ ბართიშვილს აქვს პოტენციალი, რომ დიდი ფეხბურთი ითამაშოს. მისი გამორჩეული თვისებები მოედნის ხედვა, დრიბლინგი და ისეთი სტილის თამაშია, რომელიც ფეხბურთის ყველა გულშემატკივარს სიამოვნებს.
ბართიშვილმა ფეხბურთის თამაში 5 წლის ასაკში, ავაზაში დაიწყო, რის შემდეგაც იყო დინამოს აკადემია, საიდანაც ყველამ გაიცნო. წელს მას 16 წლის ასაკში ეროვნულ ლიგაში თამაშის შესაძლებლობა მიეცა, სადაც ფოთის კოლხეთის მაისურით 18 მატჩი ჩაატარა.
"ფეხბურთი იმიტომ ავირჩიე, რომ ამ სპორტის თამაში სიამოვნებას ყველაზე მეტად მანიჭებს. ეროვნულ ლიგაში თამაში თავიდან გამიჭირდა, თუმცა ყველაფერი მიჩვევადია. გამოცდილი მოთამაშეების წინააღმდეგ თამაში ძალიან დამეხმარა განვითარებაში როგორც ფიზიკურად, ისე ტექნიკურად", - განაცხადა ბართიშვილმა LaGazzetta.ge-სთან.
ბართიშვილმა ეროვნულ ლიგაში თავი სწორედ დრიბლინგით და ლამაზი მომენტებით დაგვამახსოვრა, მან წელს ერთი საგოლე გადაცემის გაკეთებაც მოასწრო.
"სიმართლე გითხრათ, თამაშის დროს იმაზე არ ვფიქრობ ხოლმე, თუ ვინ მიდგას წინ და ვინ თამაშობს ჩემს წინააღმდეგ. ყველა მეტოქესთან ერთნაირად ვთამაშობ. ყველაზე დიდ სიამოვნებას კი დრიბლინგების გაკეთება მანიჭებს."
ბართიშვილი საქართველოს 17-წლამდე ნაკრებში თამაშობს, 19-წლამდე ნაკრებშიც იყო გამოძახებული და ნაკრების ერთ-ერთი მთავარი ლიდერია.
"ასაკობრივ ნაკრებებში თამაში ჩემთვის დიდი გამოცდილებაა, თუმცა ჩემი მიზანი და ოცნება ეროვნულ ნაკრებში თამაშია, ისევე, როგორც ყველა ფეხბურთელის. ახალგაზრდულ ნაკრებში ხვიჩას ძმა, თორნიკე კვარაცხელია ჩემი თანაგუნდელია. ვფიქრობ, თოკოს ყველაფერი აქვს იმისთვის, რომ დიდი ფეხბურთი ითამაშოს და წარმატებებს ვუსურვებ მას."
ვინ უნდა იყოს ბართიშვილის სტილის მოთამაშის საყვარელი ფეხბურთელი, თუ არა ლეო მესი? - ჩვენთან საუბარში 16 წლის ტალანტმა თავისი ფავორიტი მოთამაშეები დაასახელა.
"მესის თამაშებს ბავშვობიდანვე ყოველთვის ვუყურებდი ხოლმე და დიდ სიამოვნებას მანიჭებდა, ის ჩემთვის მისაბაძი ფეხბურთელია, რაც შეეხება ქართველებს, ჩემი აზრით, ყველაზე დიდი ქართველი ფეხბურთელი ხვიჩა კვარაცხელიაა.
დრიბლინგის გარდა, თამაშის დროს გოლის გატანა და საგოლე გადაცემების გაკეთება მიყვარს, თანამედროვე ფეხბურთში რაიან ჩერკის სტილი მომწონს, რომელსაც საოცარი ტექნიკა აქვს"
ბართიშვილი უკვე მოექცა წამყვანი ევროპული კლუბების ინტერესთა სფეროში. როგორც შევიტყვეთ, მის მატჩებს სკაუტები აქტიურად აკვირდებიან, მათ შორის იტალიიდანაც.
მომდევნო სეზონში ბართიშვილს კიდევ ექნება შესაძლებლობა, თავისი ნიჭი განავითაროს და ჩამოყალიბდეს სრულყოფილ ფეხბურთელად, რომელიც მთელ ქვეყანას აალაპარაკებს.
"ჩემი ოცნება ბარსელონაში თამაშია, რადგან ბავშვობიდან ამ გუნდს ვგულშემატკივრობ. როგორც ვთქვი, ეროვნულ ნაკრებში მოხვედრაც მსურს. ყველაფერს გავაკეთებ, რომ ქართველმა ხალხმა ჩემით იამაყოს."
