არსებობს მოსაზრება, რომ ნორვეგიის ნაკრები თავისი არსებობის საუკეთესო პერიოდს გადის. საინტერესოა ისიც, რომ 1990-იანი წლების პირველ ნახევარში სკანდინავიელებს ერთი ოქროს ეპოქა უკვე ჰქონდათ. დღეს, ფიფას რეიტინგში ისინი 30-ეულშიც არ არიან, მაგრამ 1993 წლის ოქტომბერში "ვიკინგებზე" წინ მხოლოდ ბრაზილია იყო.
დიახ, ნორვეგია იყო მეორე ადგილზე, შემდეგ მოხდა ჩამოქვეითება მეხუთემდე, 1995 წლის ივლისი-აგვისტოში კი ისევ მეორეზე დაბრუნება. 1993 წელს სკანდინავიელებმა გამართეს 10 შეხვედრა: 7 მოიგეს, 2 ითამაშეს ფრედ და მხოლოდ 1 წააგეს. 1994 წლის ივნისიდან-1995 წლის სექტემბრამდე კი "ვიკინგები" 13 თამაშის მანძილზე არ აგებდნენ.
რაც შეეხება ეგილ ულსენის გუნდის მსოფლიო ჩემპიონატზე ასპარეზობას, 1994 წლის ტურნირზე მათ ვერ გადალახეს ჯგუფური ეტაპი, წინ კი გაუშვეს იტალია, მექსიკა და ირლანდია. ეს ყველაფერი იმის გათვალისწინებით, რომ 4-ვე ეროვნულმა გუნდმა დააგროვა 4 ქულა, მაგრამ ნორვეგია ჯგუფში ბურთების უარესი ბალანსის გამო ჩარჩა.
1994 წლის მსოფლიო ჩემპიონატზე სკანდინავიელების შემადგენლობაში იყვნენ ალფ-ინგე ჰოლანდი, გორან სორლოთი და ერიკ თორსტვედი. დღეს, "ვიკინგთა" რიგებში თამაშობენ ნორვეგიელი ექს-ფეხბურთელების შვილები: ერლინგი, ალექსანდერი და კრისტიანი. მუნდიალის გამართვის ადგილმდებარეობა უცველია, კვლავ აშშ.
თუ ულსენის გუნდმა ვერ მოახერხა ჯგუფური ეტაპის დაძლევა, ახალმა თაობამ წინამორბედებს უკვე აჯობა და მსოფლიო ჩემპიონატის პლეიოფში გააღწია. მოწინააღმდეგე კოტ-დ'ივუარია და მოგების შემთხვევაში, ნორვეგია გავა 1/8 ფინალში, სხვათაშორის პირველად, საფრანგეთის მუნდიალის შემდეგ.
