ალჟირის ნაკრების კარში სამი გოლის გატანით, ლიონელ მესიმ რამდენიმე რეკორდი როგორც გაიმეორა, ისე დაამყარა. პირველ რიგში გამოსარჩევია ის ფაქტი, რომ არგენტინელ ფლეიმეიქერს მუნდიალებზე დაუგროვდა 16 ბურთი, რითაც ის მიროსლავ კლოზეს გაუთანაბრდა. აბსოლუტურ რეკორდამდე "ალბისელესტეს" კაპიტანს 1 გოლი სჭირდება.
გერმანელ თავდამსხმელთან გათანაბრება ავტომატურად ნიშნავს რონალდო ნაზარიოს გადასწრებას, ვინც 15 გოლით, 2014 წლის მსოფლიო ჩემპიონატამდე ყველა დროის საუკეთესო გოლეადორი იყო. "სელესიონის" მე-10 ნომერმა ზეიმი ჩაუშხამა კილიან მბაპესაც, რომელმაც იქამდე რამდენიმე საათით ადრე, მუნდიალებზე თავისი მე-13 და მე-14 გოლები შეაგდო.
"ლა პულგამ" აჯობა კრიშტიანუ რონალდუსაც, ვინც გუშინდელ მატჩამდე იყო ყველაზე ასაკოვანი ფეხბურთელი მსოფლიო ჩემპიონატების ისტორიაში, რომელმაც ჰეთ-თრიქი გაიფორმა. პორტუგალიელი ფორვარდი ესპანეთის ეროვნულ კარში გატანილი 3 ბურთის მომენტში იყო 33 წლისა და 130 დღის, მესი კი 38 წლისა და 357 დღის.
გუშინდელ მატჩამდე უნიკალურ რეკორდს ფლობდა გონსალო იგუაინიც, ვინც იყო ერთადერთი არგენტინელი ფეხბურთელი 21-ე საუკუნეში, რომელმაც მუნდიალზე ჰეთ-თრიქი გაიფორმა. როგორც ვხედავთ, ლეომ მისი მიღწევაც გაიმეორა. ბოლოს კი მთავარი: ჩამოტოვებულია ედსონ არანტეს დო ნასიმენტო პელეც.
ბრაზილიელ შემტევს მსოფლიო ჩემპიონატების ისტორიაში განხორციელებული ჰქონდა ყველაზე მეტი, 21 შედეგიანი ქმედება (12 გოლი, 9 საგოლე პასი), არგენტინელმა ფლეიმეიქერმა კი თავისი მაჩვენებელი აიყვანა 24-მდე, 16 გატანილი ბურთი და 8 განხორციელებული ასისტი.
