მე-5 მედალი მოიპოვა საქართველოს დელეგაციამ პარიზში მიმდინარე პარალიმპიურ თამაშებზე. პარა ძიუდოისტმა ზურაბ ზურაბიანმა (-60კგ. კატეგორია J2) ვერცხლის მედალი დაისაკუთრა. ფინალში ქართველმა უზბეკ შერდოზ ნამოზოვთან წააგო.
ზურაბიანმა ასაპრეზობა მეოთხედფინალიდან დაიწყო, სადაც ჩილეს წარმომადგენელს, იოჰან ჰერერას ვაზარით სძლია, შემდეგ კი ალჟირელი იაშ ულკუიდერი დაძაბულ ბრძოლაში დაამარცხა.
პარიზში მიმდინარე პარალიმპიურ თამაშებზე, ამ დროისთვის საქართველოს დელეგაციის ანგარიშზე 5 მედალია, ჩემპიონი პარამძლეოსნი, ბირთვის კვრაში გიგა ოჩხიკიძე გახდა, ბრინჯაოს მედლები პარატაეკვონდოში ანა ჯაფარიძემ და ეტლით ფარიკაობაში (ხმალი) ნინო თიბილაშვილმა მოიპოვეს, ვერცხლის მედალები პარა ძიუდოისტმა ზურაბ ზურაბიანმა და ვლადიმერ ჭინჭარაულმა 50 მეტრზე პნევმატური შაშხანიდან სროლაში დაისაკუთრეს. 5 მედალი საქართველოს ერთ პარალიმპიურ თამშებზე აქამდე არასდროს მოუპოვებია.
ხვალ ქართველთაგან პარალიმპიურ თამაშებზე პარა ძიუდოისტები გიორგი ქალდანი (J2 -73 კგ.) და ინა ქალდანი (J2 -73კგ.) იასპარეზებენ.
ინა ქალდანი ტოკიოს პარალიმპიური თამაშების ვერცხლის მედლის პრიზიორია.
