გიორგი მიქაუტაძემ სომხეთის ნაკრებს ერთა ლიგის პლეიოფში დუბლი შეუსრულა. ახალგაზრდა თავდამსხმელს საქართველოს ეროვნული გუნდის შემადგენლობაში 36 მატჩში დაუგროვდა 18 ბურთი, რითაც მან ყველა დროის საუკეთესო გოლეადორთა სიაში მე-2 პოზიციაზე გადაინაცვლა. ლიონის ფორვარდზე წინ არის მხოლოდ შოთა არველაძე, 26 გოლით.
ამის გარდა, ქართველი თავდამსხმელის ანგარიშზე არის კიდევ ერთი საინტერესო მიღწევა. საქმე ისაა, რომ გოლების გატანის საშუალო პროცენტული მაჩვენებლით, 24 წლის ფორვარდი "ჯვაროსნების" ისტორიაში ყველაზე შედეგიანია. ახალგაზრდა შემტევი საშუალოდ 1 მატჩში 0.50 ბურთს იტანს.
დიახ, ჩვენი ნაკრების 22-ე ნომერზე უფრო მაღალი პროცენტული მაჩვენებლი აქვთ გიორგი არაბიძესა (0.75) და (0.67) კახაბერ კაჭარავას, თუმცა ორივე მათგანს 4-ზე მეტი მატჩი "თეთრ-წითლებში" არ ჩაუტარებიათ. 0.50 ასევე გვხვდება ზაზა ჯანაშიასთან, დიმიტრი ტატანაშვილთან, ირაკლი სიხარულიძესთან, თეიმურაზ შონიასთან და ვატო არველაძესთან, მაგრამ მათ საქართველოს ეროვნული გუნდის რიგებში ასევე ცოტა მატჩი აქვთ ჩატარებული.
მიქაუტაძე კი "ჯვაროსნების" რეგულარული მოთამაშეა, 36 შეხვედრით თავის აქტივში. როგორც აღვნიშნეთ, მასზე წინ არის მხოლოდ გლაზგო რეინჯერსის ყოფილი ფორვარდი, რომელმაც 26 ბურთის გატანა 62 მატჩში შეძლო. ლეგენდარული ქართველი შემტევის პროცენტული მაჩვენებელი უდრიდა 0.42-ს, რაც ნიშნავს იმას, რომ ჟორჟი ჩვენი ეროვნული გუნდის ყველა დროის საუკეთესო გოლეადორზე უფრო შედეგიანია.